Энэ сарын 3-ны өдөр 18.00 цагийн үед Баянгол дүүргийн нэгдүгээр хороо, Шастины нэрэмжит III эмнэлгийн баруун талд баригдаж буй барилгад бетон зуурмаг шахаж байсан кран осолдсоны улмаас ойролцоох замын гарцаар гарч явсан 12 настай охины дээрээс нурж амь насыг нь хохироосон хэрэг гарсан билээ.
    Энэ сарын 3-ны өдөр 18.00 цагийн үед Баянгол дүүргийн нэгдүгээр хороо, Шастины нэрэмжит III эмнэлгийн баруун талд баригдаж буй барилгад бетон зуурмаг шахаж байсан кран осолдсоны улмаас ойролцоох замын гарцаар гарч явсан 12 настай охины дээрээс нурж амь насыг нь хохироосон хэрэг гарсан билээ. Тус баригдаж буй барилга нь “Төгс бүрэн” ХХК-ийнх байжээ. Мөн ямарч зөвшөөрөлгүй үйл ажиллагаагаа явуулж байсан аж. Ингээд барилгатай холбоотой асуудлаар НМХГ-ын дарга Л.Бямбасүрэнгээс тодрууллаа.

-Тус барилга хууль бус барилга байсан гэж байна. Хууль бус барилга баригдаж байхад НМХГ-аас ямар нэгэн арга хэмжээ аваагүй юмуу?

-Тус барилга баригдахад бид зогсоохыг шаардсан. Гэтэл барилгын ажлаа явуулсаар гурван давхар хүргэсэн байсан. Гурван давхар болоход нь зогсоохыг дахин шаардаж, мэдэгдэл хүргүүлсэн. Гэвч тэр бүхнийг эс тоосоор өнөөдөр долоон давхар хүртлээ баригдчихаад байна. Бид хуулийн хүрээнд ажлаа явуулдаг. Зогсоохгүй бол бид баримт бичгээ шүүхэд хүргүүлдэг юм. Шүүхээс баримт бичиг баталгаажсан нөхцөлд Шүүхийн шийдвэр гүйцэтгэх алба арга хэмжээ авах ёстой.

-Гурван давхар хүртэл баригдчихаад байхад танайхаас яагаад өдий болтол хяналт тавиагүй юм бэ?

-Зөвшөөрөл аваагүй байхад манайхаас хяналт тавихгүй. Үйл ажиллагаагаа зогсоох мэдэгдэл хүргүүлсэн. Бидний тавьсан шаардлагыг тухайн компани биелүүлэх л ёстой.

-Тэгээд энэ компани зогсоохгүй байсан гэлээ. Тэгээд шүүхэд өгсөн үү?

 -Одоо өгөх гэж байна.

-Яагаад өдийг хүртэл өгөөгүй байгаа юм. Заавал хүний амь эрсэдсэний дараа өгөх байсан юм уу?

-Би яг одоо хариулж мэдэхгүй байна. Бичиг баримтаа бүрдүүлэх үүрэг хүмүүстээ өгчихсөн байгаа. МХЕГ-ын дарга үүрэг өгөөд ажлын хэсэг гараад ажиллаж байна. Энэ ажлын хэсгийн ажлыг тодруулсаны дараа хариу өгье.

-Хэрвээ танай байгууллага тус компанийг аль эрт шүүхэд өгсөн бол өнөөдөр охины амь нас эрсдэхгүй байсан байх?

-Ер нь Шүүхийн шийдвэр гүйцэтгэх албанд /ШШГА/ бид өөр хоёр ч компанийг зогсоох бичиг хүргүүлсэн. Гэтэл тус хоёр компани өнөөдрийг хүртэл үйл ажиллагаагаа явуулсаар байна. Үүнийг ШШГА зогсоох ёстой.  

-Охины амиа алдсан асуудалд хэн хариуцлага хүлээх вэ?

-Хэргийг Баянгол дүүргийн цагдаагийн хэлтэст шалгаж байгаа.