МАХН-ын дарга Н.Энхбаяр Нэгдсэн хоёрдугаар эмнэлэгт хэвтэн эмчлүүлж байгаа. Түүний бие тааруу, Монголд эмчилж чадахгүй "эмгэг" туссан гэж МАХН-ынхан мэдэгдсэн. Харин Н.Энхбаярын гэргий О.Цолмон нөхрөө байнга сахиж байгаа аж. Тэрбээр "Онош нь тогтоогдохгүй байгаа. Биеийнх нь эд, эсийн хэмжээнд өөрчлөлт явагдаж байна гэсэн. Манай улсад ийм өөрчлөлтийг оношлох багаж байдаггүй юм байна. Өөх, тос, уураг хэрэглэж аргацаасан эмчилгээг нь зогсоовол ямар ч байдалд хүрч болзошгүй байна" гэв. Мөн О.Цолмон "Нөхрийг минь анх баривчлахдаа муужруулаад авч явсан. Тэгэхдээ л нэг юм хэрэглэсэн байх гэж бодож байгаа. Ямар нэг хортой тариа тарьсан гэж хардаж байна" хэмээн нөхрийнхөө өвчний талаар таамаг дэвшүүлжээ.