Барилга, хот байгуулалтын Яам, Газрын харилцаа, геодези, зураг зүйн газар, Нийслэлийн Засаг даргын Тамгын газар зэрэг төрийн байгууллагууд Япон улсын Газар, Дэд бүтэц, тээвэр, Аялал жуулчлалын яамтай хамтран “Монгол-Японы хот байгуулалтын салбарын семинар”-ыг энэ сарын 11-нд зохион байгуулна. Монгол улсын Зам, тээврийн яам, Монгол дахь Япон улсын Элчин сайдын Яам, Японы Олон Улсын Хамтын ажиллагааны байгууллага (JICA), Хоккайдо муж болон Саппоро хотын захиргаа зэрэг байгууллагууд уг семинарыг дэмжин оролцох бөгөөд хоёр улсын орон нутгийн байгууллагууд, хувийн хэвшлийн төлөөллүүд мөн  оролцох юм.

             Уг семинар нь Монгол Улсын хот байгуулалтын салбарын үйл ажиллагааг эрчимжүүлэх, хот байгуулалтын үйл ажиллагаанд оролцогч талуудын хамтын ажиллагаа, хоорондын уялдаа холбоог сайжруулах, хоёр улсын төр хувийн хэвшлийнхний хоорондын найрсаг харилцааг гүнзгийрүүлэн хөгжүүлэх, гэр хорооллыг хөгжүүлэх, агаарын бохирдол, нийтийн тээвэр, авто замын түгжрэл зэрэг Улаанбаатар хотод тулгамдаад буй асуудлуудыг шийдвэрлэх талаар санал бодлоо солилцох зорилготой. Мөн Япон улсаас Монгол улсад оруулах хөрөнгө оруулалтын хэмжээг нэмэгдүүлэх, Япон улсын хот байгуулалт, төлөвлөлтийн тэргүүн туршлага, техник технологи, ноу-хау-г ашиглах замаар Японы хувийн хэвшлийнхний Монгол дахь үйл ажиллагааг нэмэгдүүлэхэд чиглэнэ.  Тус семинарын  салбарын хуралдаанаар “Нийтийн тээврийн гол  шугамын дагуух орчныг хөгжүүлэх ба түүний үр өгөөж”, “Хүйтэн бүсийн нутагт зам тавих технологи”, “Байгаль орчинд ээлтэй нийтийн орон сууц барих бодлого” зэрэг Улаанбаатар хотод тулгамдсан, нэн даруй шийдвэрлэх шаардлагатай сэдвүүдээр Япон улсын төлөөлөгчид илтгэл тавьж, санал солилцоно.

 Энэ жил Монгол Япон хоёр улс дипломат харилцаа тогтоосны 40 жилийн ой тохиож буй бөгөөд, энэхүү семинар нь ойн арга хэмжээний хүрээнд зохиогдож байгаа юм.