2012 оны УИХ-ын ээлжит сонгуулийн үр дүнд Иргэний Зориг Ногоон намын жагсаалтын 1, 2 дугаарт эрэмбэлэгдсэн ИЗНН-ын гишүүн, ИЗНН-ын даргын сонгуульт ажилтай эрхэм С.Оюун, С.Дэмбэрэл та хоёр УИХ-ын гишүүн болсон билээ.
    УИХ-ын гишүүний бүрэн эрхээ эдэлж эхэлснээс хойш хоёр сар өнгөрч та бүхэн хууль санаачлах онцгой эрх мэдлийг бодитоор хэрэгжүүлж С.Дэмбэрэл та УИХ-ын дэгийн тухай хуулинд “24 цагийн дотор намууд бүлэг байгуулах тухай заалтыг хүчингүйд тооцох” утга бүхий нэмэлт өөрчлөлт оруулах тухай хуулийн төслийг өргөн барьсан. Харин С.Оюун та “Аймаг, сум, дүүргийн сонгуулийн тухай” хуулийг санаачилсан байна.
    Улс төрийн намыг төлөөлж, улс төрийн намын бодлогын хүрээнд хууль санаачлах үүрэг бүхий эрхэм УИХ-ын гишүүд та бүхэн ИЗНН-ын улс төрийн зөвлөл, бодлогын хороодтой зөвшилцөлгүй бие даан шийдвэр гаргаж, дээрх хуулийн төслүүдийг санаачилсан үйлдэл тань ИЗНН-ын дүрмэнд харшилсан хариуцлагагүй үйлдэл боллоо гэж үзэж байна.
    Зарим нэг улс төрийн хүчний нөлөөнд автсан мэт эргэлзээтэй дээрх хуулийн төсөл өргөн барьсан үйлдэлдээ дүгнэлт хийж ИЗНН-ын гишүүд, дэмжигчид, улс төрийн зөвлөлд албан ёсоор тайлбар хийнэ гэдэгт гүнээ итгэж байна.