УИХ-ын ээлжит сонгулийн марафон сенсаацаар дүүрэн өрнөж, шинээр сонгогдсон парламентийн гишүүд тангарагаа өргөлөө.

Асуудал эцэслэгдэж, УИХ-ын даргаар Г.Занданшатарыг улираахаас эхлээд албан тушаалын томилгоо ид үргэлжилж байна. Үүнтэй зэрэгцээд хотын ээлжит даргаар хэн томилогдох бэ гэдэг таамаг олон нийтийн дунд өрнөж эхэллээ. Учир нь УИХ-ын 2020 оны сонгуульд нийслэлийн Засаг дарга бөгөөд Улаанбаатар хотын захирагч С.Амарсайхан нэр дэвшин ялалт байгуулсан учраас түүний суудал тун удахгүй эзгүйрэх гэж буй юм.

Хотын мээрт НИТХ-ын дарга Р.Дагва, Хөгжлийн бодлогын асуудал хариуцсан Нийслэлийн Засаг даргын нэгдүгээр орлогч Ж.Батбаясгалан, Зам тээврийн асуудал хариуцсан төслүүдийн удирдагч, Засаг даргын орлогч Б.Отгонсүх нарын нэрс яригдаж байна. Р.Дагвын хувьд УИХ-ын гишүүн Д.Сумъяабазар зүтгүүлж буй гэх шуум бий. Энэ нь ч оргүй байхыг үгүйсгэхгүй. Харин Ж.Батбаясгалан, Б.Отгонсүх нарын хувьд яг таг энэ гээд хэлчих зүйл одоохондоо алга.  Тэгвэл тэдний хэн нь дараагийн Засаг даргад тэнцэх вэ.

НИТХ-ын дарга Р.Дагва
 

Тэрбээр эрхзүйч мэргэжилтэй. 2006 оноос МҮОНРТ-д хүний нөөцийн албаны дарга, 2007 оноос НЗДТГ-т Хэвлэл мэдээллийн албаны дарга, 2010 оноос Сонгинохайрхан дүүргийн ЗДТГ-ын орлогчоор ажиллаж байсан. Улмаар 2016 онд НИТХ-ын төлөөлөгчөөр сонгогдож, 2018 онд НИТХ-ын МАН-ын бүлгийн дарга, 2019 онд НИТХ-ын даргаар томилогдсон. 

Өнөөдрийн байдлаар НИТХ даргаас өөр ямар нэг давхар ажил үүрэг, хувийн компанигүй. Энэ нь сайн тал. Жилийн 89 сая төгрөгийн орлоготой, гэр бүлийн гишүүд нь 30 гаруй сая төгрөгийн орлого олдог. 330 сая төгрөгөөр үнэлэгдэх нэг орон сууцтай, 191 сая төгрөгөөр үнэлэгдэх хоёр машинтай, 71 сая төгрөгийн газар 40 сая төгрөгийн үнэт эдлэлтэй, дансандаа 16 сая төгрөгтэй хэмээн ХОМ-ээ бөглөсөн. Эндээс үзвэл, албан тушаал ахихын хэрээр эд хөрөнгө нь арвижаагүй гэдэг нь харагдана.

МАН-ын далбаан дор дүүргийн Засаг даргын орлогч болж томорч, 2016 онд нам нь ялахтай зэрэгцэн НИТХ-д суусан тэрбээр дахиад л намын нөлөө, бас татаасаар хотын даргад зүтгэхээр болж буй бололтой. Энэ ч утгаараа хотын дарга болох магадлалтай хүмүүсийн жагсаалтыг өнгөлж байна.

Засаг даргын орлогч  Б.Отгонсүх

Олон улсын хуульч, эрх зүйч мэргэжилтэй. Анх Баянгол дүүргийн НАМЗХ-аас гараагаа эхэлсэн түүнийг С.Амарсайхан багтаа авч Зам тээврийн асуудал хариуцсан төслүүдийн удирдагчаар томилсон. Харин одоо хотын дараагийн дарга болох хүнээр яригдаж байна. Тэрбээр 2015 оноос Хөдөлмөр, нийгмийн хамгааллын сайдын зөвлөхөөр ажиллаж байгаад 2016 онд НИТХ-ын төлөөлөгчөөр сонгогдсон. Эрчим хүчний яамны “Эгийн голын усан цахилгаан станц” ТӨХК-ийн захирлаар ажиллаж байгаад 2019 оны дөрөвдүгээр сараас Нийслэлийн Зам, тээврийн асуудал хариуцсан төслүүдийн удирдагчаар томилогдон ажиллаж байгаа.

Налайх-Чойрын 20,9 км замын төслийг зургаан сарын дотор дуусгахад ихээхэн үүрэг гүйцэтгэж, Олимпийн гүүр, Сонсголонгийн гүүр, Баянзүрхийн гүүр зэрэг томоохон  төслийг ахлан ажиллажээ.

Б.Отгонсүхийн хувьд жилдээ 100 орчим  сая төгрөгийн, гэр бүлийн гишүүд нь 22 сая төгрөгийн орлоготой, 661 сая төгрөгөөр үнэлэгдэх хоёр орон сууцтай, 700 саяар үнэлэгдэх үнэт эдлэл буюу хөөрөгтэй байна.

ББСБ-тай хотын орлогч Ж.Батбаясгалан
 

Нийслэлийн Засаг даргын Хөгжлийн бодлогын асуудал хариуцсан нэгдүгээр орлогч Ж.Батбаясгалан хотын даргаар томилогдох магадлалтай хүмүүсийн нэг. Ж.Батбаясгалан нь Эрх зүйч мэргэжилтэй. 2004 оноос хотын мээр асан Бадамжунайн туслахаар ажиллах болсноор улстөрийн алба хашиж эхэлсэн. 2016 онд Баянгол дүүргээс НИТХ-д сонгогдсон, улмаар Нийслэлийн засаг даргын агаарын бохирдол, ногоон хөгжил хариуцсан орлогчоор ажиллаж байгаад 2019 оны хоёрдугаар сараас С.Амарсайханы багт нэгдүгээр орлогчоор ажиллаж буй. Энэ ч утгаараа туршлага дутах нэгэн биш. Түүнийг намдаа нөлөөтэй,  МАН-ын нөлөө бүхий хүмүүсийн дэмжлэгийг авдаг гэгддэг. 

Ж.Батбаясгалангийн хувьд жилээс жилд хөрөнгө орлого нь нэмэгдсээр байгааг ХОМ-ээс харж болно. Жилийн 100 гаруй сая төгрөгийн орлоготой, гэр бүлийн гишүүд нь 200 гаруй сая төгрөгийн орлоготой. Нэг зуслангийн байшин, нэг орон сууцтай. Эдгээр 355 сая төгрөгөөр үнэлэгдэж байна. 55 сая төгрөгийн үнэлгээтэй машинтай, 100 гаруй сая төгрөгийн үнэлгээ бүхий малтай, долоо байршилд газартай ч үнэлээгүй. 60 сая төгрөгийн үнэт эдлэл 175 сая төгрөгийн хадгаламжтай, "Алтан хот" ББСБ-ыг эзэмшдэг. 

Г.Нацаг-Эрдэнэ