Монголын нөлөө бүхий хоёр бизнесмений маргаанд “Номин холдинг”-ийн захирал Ш.Баярсайхан яллаа. Тодруулбал, “Эрэл”-ийн Б.Эрдэнэбат, “Номин холдинг”-ийн захирал Ш.Баярсайхан нарын хооронд өнгөрсөн оноос эхлэн маргаан өрнөсөн юм. Шалтгаан нь “Ариг” банкийг үүсгэн байгуулагч Б.Эрдэнэбат хувь нийлүүлэгч Ш.Баярсайханыг залилсан гэх асуудалтай холбоотой. Чухам тус банкны томоохон хувьцаа эзэмшигчдийн дунд гарсан маргаанаас үүдэн хадгаламж эзэмшигчид нь хөрөнгөө татаж, банк цаашид орших уу, эс орших уу гэсэн нөхцөл байдалд хүрээд байна.

“Байшин үйлдвэрлэх комбинат” төслөөрөө Хөгжлийн банкнаас 70.4 тэрбум төгрөгний зээл авсан ч эргэн төлөөгүй шалтгаанаар найдваргүй зээлдэгч болсон “Эрэл” ХХК “Ариг” банкны хөрөнгийг өсгөж, үйл ажиллагааг нь тогтвортой болгож чадах эсэх нь ихэд эргэлзээтэй. Учир нь 2018 онд Монголбанкнаас одоо байгаа өөрийн хөрөнгийн хэмжээ болох 35 тэрбум төгрөгийг 50 тэрбумд хүргэх даалгавар өгсөн ч биелүүлээгүй аж. Түүгээр ч зогсохгүй Б.Эрдэнэбат нь гэр бүлийн гишүүдийн нэр дээр тус банкинд байршиж байсан мөнгийг татан авсан нь банкийг хүнд байдалд оруулах нэг шалтгаан болжээ.

“Ариг” банкны хувьцааны 60.46 хувийг Б.Эрдэнэбат үлдсэнийг Ш.Баярсайхан эзэмшдэг. Тэдний анх гэрээлсний дагуу “Ариг” банканд 27.5 тэрбум төгрөгийн хөрөнгө оруулж банкны 49 хувийг, БҮК-1 үйлдвэрт 20 тэрбумыг оруулан 20 хувийг нь эзэмшүүлэх, улмаар тус үйлдвэрийн хөгжлөөс шалтгаалан нэмж хөрөнгө оруулах, эсвэл оруулсан мөнгөө 1.59 хувийн хүүтэйгээр Ш.Баярсайхан буцаан авах талаар гэрээ байгуулсан аж. Гэвч Б.Эрдэнэбат “Ариг” банканд оруулсан хөрөнгийг БҮК-1 үйлдвэрт оруулсан гэж тооцон хувьдаа авч ашигласан.

Түүгээр ч зогсохгүй Эрэл” ХХК-ийн охин компани болох “БҮК-1” үйлдвэрийг улсын бүртгэлд бүртгэлтэй аж ахуйн нэгж гэж танилцуулахаас гадна тоног төхөөрөмжийг нь Хөгжлийн банкны барьцаанд тавьснаа ч нуусан нь хэргийн мөрдөн шалгах ажиллагааны явцад тодорхой болсон байна.

Улмаар Нийслэлийн Прокурорын газраас Эрүүгийн хуулийн 17.3-2.2-т заасан “Бодит байдлыг нуух замаар бусдыг төөрөгдөлд оруулж, урьдын харилцааны явцад бий болсон итгэлийг урвуулан ашиглаж бусдын эд хөрөнгийг залилж ноцтой хохирол учруулсан”, 18.6-2.2 дахь хэсгийн “Гэмт хэргийн улмаас олсон хөрөнгө, мөнгө, орлого гэдгийг мэдсээр байж түүнийг авсан, эзэмшсэн, ашигласан, түүний хууль бус эх үүсвэрийг нь нуун далдлах хэргийг байнга тогтвортой үйлдсэн” зэрэг үндэслэлээр яллах дүгнэлт үйлдэж, шүүхээс Б.Эрдэнэбатыг бусдыг залилсан үйлдэлд нь тав, мөнгө угаасан хэрэгт нь хоёр жил нийт долоон жил хорих ял оноосноор жил гаруй үргэлжилсэн маргаан дуусгавар боллоо. Мөн бусдад залилагдсан гэх хохирогч Ш.Баярсайханд 20.6 тэрбум төгрөг гаргуулж өгөхөөр шийдвэрлэсэн юм.

Гэхдээ энэ шийдвэр шүүхийн эцсийн шийдвэр биш бөгөөд Б.Эрдэнэбат нь хуульд заасны дагуу давж заалдах эрхтэй юм.

Б.Лхам