Ж.Батзандан иргэний нийгмийн хөдөлгөөнийг удирдаж явахдаа тухайн үеийн Ерөнхийлөгч Н.Энхбаярын “дэглэм”-ийг хамгийн их эсэргүүцэж явжээ. 2006 оны үед юм. Эхлүүлсэн ажил нь ч үр дүнд хүрсэн, Ж.Батзандан Иргэний хөдөлгөөний намыг байгуулах хүртлээ дэвшиж байлаа, 2008 онд. Бүлгийн даргаас Ерөнхий сайд, УИХ-ын дарга, бүр Ерөнхийлөгч болтлоо дэвшсэн Н.Энхбаярын урдаас эсэргүүцлийг үг чулуудах нь байтугай ч, эгцэлж харах нь “хориотой” байсан гэлцдэг тухайн цаг үед иргэний хөдөлгөөнийг удирдаж, экс Төрийн тэргүүний босгосон хана хэрмийг нурааж ахуй цаг дор түүн шиг эрэмгий тэмцэгч улс төрийн хүрээнд байгаагүй, тодорч гараагүй нь үүнийг гэрчилнэ.

Эвслийн Засгийн газрыг бүрдүүлэх гэж АН-ынхан Л.Гүндалайд тал засч, Эрүүл мэндийн сайдын суудлыг хүртэл өгч явахад Ж.Батзандан хөшигний ар дахь улс төрийн тохироо, албан тушаалын хуваарилалтыг илчилж, иргэдийн төлөөллийн хамт Төрийн ордныг тойрон эсэргүүцэж явсан нь 10 гаруй жилийн өмнөх үйл явдал.

Улстөрчид Н.Энхбаярын эсрэг дуугарах нь байтугай түүнтэй ам зөрөхөөс эмээж явахад Ж.Батзандан тэргүүтэй иргэний хөдөлгөөнийхөн түүнээс шударга ёсыг шаардаж, Төрийн ордныг тойрон гороолж, түмпэн сав, поошиг нүдэж, өндгөөр “дайлаар мордох” нь энүүхэнд байсан хэрэг. Монгол Улс ардчилсан нийгмийн тогтолцоонд шилжиж, үг хэлэх, үзэл бодлоо илэрхийлэх эрхтэй болсон ч хэвлэл мэдээллийн хэрэгслээс эхлээд иргэдийн сонголтоор бүрдсэн парламентын гишүүд нь хүртэл байр сууриа олон нийтэд хүргэхэд "цензуртай" байхад, Ж.Батзандан тэргүүтэй хөдөлгөөнийхөн тэмцэж байсан гэсэн үг.

Долдугаар сарын 1 хэмээх Монголын түүхэнд хар толбо үлдээсэн өдрөөр О.Магнай, Б.Жаргалсайхан нарын хамт жагсаал зохион байгуулж асныг эс тооцвол өнөөдрийг хүртэл “Шударга” дүр нь түүний имиж хэвээрээ байв. Байв гэсэн нь учиртай. Л.Болд, Л.Оюун-Эрдэнэ, Т.Аюурсайхан нарын хамт УИХ-ын дарга асан М.Энхболдыг огцруулах акц өрнүүлж, хоёронтоо жагсаал зохион байгуулахад оройлон оролцсон нь Ж.Батзандан.

Хүссэндээ ч хүрсэн, М.Энхболд ч суудлаасаа буусан.

Үүгээр нь Ж.Батзанданг монголчууд мэднэ. Өнгөрснөөс өнөөдрийг хүртэл хэлж, ярьж, тэмцэж, бүтээж ирсэн түүний фигурт бүгдээрээ дуртай мөн “хайртай”. Тэр өөрөө ч “Би 15 настай байхдаа л эх орныхоо төлөө зүтгэнэ гэж өөртөө амласан” гэдгээ мэдэгдэж байв.

Гэвч ШИНЭН-ын дарга Ж.Батзандангийн үзэл бодол борооны дараах мөөг шиг олшрох болжээ. Нэгэн цагт шар бүч, хар пальтотой тэмцэгч, иргэний нийгмийн хөдөлгөөний Ж.Батзандан бус хар хослолтой улстөрчийн хувиар, тэгэхдээ эргэж, буцсан нэгний дүрээр л олон нийтэд харагдах болов.

2020 оны сонгуулийн үр дүн гарсны дараа ШИНЭН-ын дарга Ж.Батзандан хариуцлага хүлээж огцрохоо мэдэгдэж байсан нь сар гаруйн өмнөх үйл явдал. "ШИНЭ эвсэл УИХ-д нэг ч мандат авч чадсангүй. Бид илүү их ажиллах шаардлага тулгарч байна гэдэг дүгнэлтийг иргэд өгч байна. Шинэ эвсэл суудал авч чадаагүй тул Шинэ эвслийн даргын үүрэгт ажил болоод намын даргын суудлаа өгч байна" гэсэн нь одоо ч хэвлэлийн хуудаснаа дурайж байна.

Гэтэл саяхнаас эрх баригч намын үйл ажиллагааг эсэргүүцсэн сөрөг хүчин АН-ын зохион байгуулж буй акцын гол дүрийн нэг баатраар нь Ж.Батзандан тодрох болсон нь өөрийн эрхгүй анхаарал татах болов.

Уг нь сонгуулийн үр дүнг хүлээн зөвшөөрч мэдэгдэл хийсэн зургадугаар сараас хойш өнөөдрийг хүртэл тэрбээр ямар нэгэн алхам хийсэнгүй. Сар хагасын хугацаа гэдэг ШИНЭН хурлаа хийж, Ж.Батзандан Намын даргын суудлаа дараагийн хүндээ шилжүүлэх хангалттай л хугацаа. Гэвч тэгсэнгүй. Тийм зүйл ч болсонгүй.

Эсрэгээрээ МАХН-ын даргатай дэр нэгтгэн улс төрийн дараагийн тэмцлээ хийхээ мэдэгдэж эхэлсэн нь Ж.Батзанданг, өөрийг нь муухай харагдуулах үндсэн шалтгаан болж байна. 

Энэ бүх шалтгаан нь Ж.Батзандан гишүүнийг шударга гэхээсээ итгэж болох хүн мөн үү гэсэн эргэлзээг төрүүлж байна.

Нэгэн цагийн цогтой хамтрагч О.Магнайтайгаа хүртэл нэг завин дээр багтахаа больсон цаг үе түүнд бий ч одоогийн тулах баганаа болгож яваа Л.Болдтой, хоршиж эхэлсэн МАХН-ын даргатай хомжын өдөр зам салахыг үгүйсгэх аргагүй. Ямар ч байсан “Хаан явахад нь хатгана, харц болоход нь хамтардаг” улстөрчийн араншин Монголд бий болж байгаа бололтой. Улс төрд мөнхийн найз, дайсан байхгүй. Зөвхөн мөнхийн эрх ашиг бий гэдэг үгийн учиг энэ.

Яг үнэндээ Н.Энхбаярыг "Хаан" явах үед нь тэмцэж, эсэргүүцэж явсан Ж.Батзанданг эргээд түүнтэй эвсэж, хамтраад явна гэж иргэний нийгмийн төлөөлөл, иргэд олон нийт лав төсөөлөөгүй байж таарна.

Г.Эрхэс