УИХ-ын гишүүн С.Амарсайханаас зарим зүйлийг тодрууллаа. 

-Сангийн сайдын зүгээс хотыг төсвөөс салгаад өөр өөрсдөө асуудлыг шийддэг болох санал гаргасан юм байна лээ. Тийм боломж байгаа юм уу. Хотын удирдлагуудын зүгээс тийм байх боломжгүй гэдэг хариу өгсөн гэсэн?

-Төсвийг бүгдийг үлдээе гэвэл нийслэлийн хэмжээнд байгаа сургууль, цэцэрлэг зэрэг бүх байгууллагуудын урсгал зардал, засвар үйлчилгээ нийслэл дээр ачаалал болж ирэх учраас төсвөө дааж чадахгүйд хүрнэ. Одоогийнхоосоо хүнд байдалд орно гэсэн үг. Тиймээс одоо байгаа төсвийг нь татахгүйгээр үлдээгээд урсгал, зардал бусад төрийн өмчит байгууллагуудын засвар, үйлчилгээний зардал зэргийг өмнө нь явж ирсэн Төсвийн тухай хуулиар зохицуулах нь зөв. Дээр нь нийслэлд үнэт цаас юм уу өөрөө өөрийгөө санхүүжүүлэх эрхийг нь олгохгүй бол хэдэн төгрөг төвлөрүүлдэг. Түүнийг нь бүгдийг нь улсын төсөв рүү татаад явчихдаг. Дахиад тавьдаг хөрөнгө оруулалт байхгүй. Шийддэг асуудал нь их, бага хэмжээнд байдаг учраас өнөөдөр яригдаж байгаа хүнд асуудлууд шийдэгдэхгүй байгаа юм. Тиймээс төсвийг нэмдэгээ болиоч. Мөн улсын төсөвт нийслэлийн олсон орлогыг төвлөрүүлдэгээ болиоч гэж байгаа юм. Хүн амын 50 гаруй хувь нь амьдарч байна. Улсын хамаг хүндрэлтэй асуудал бий болчихсон байхад урсгалаар нь явуулад байх боломжгүй.

-Нийслэл улсын төсөвт жилд хэдэн төгрөг төвлөрүүлдэг юм бэ?

-2020 онд 319 тэрбум төгрөг төвлөрүүлэх байсан бол 2021 онд 100 тэрбумаар өсөөд 420 тэрбум төгрөгийг төвлөрүүлэх болж байгаа юм. Энэ нь өөрөө нийслэлийг цааш нь ажил амьдралаа авч явах ямар ч боломжгүй болгож байгаа юм. Нийтийн тээврээ яаж шинэчлэх юм. Ядаж нийтийн тээврээ шинэчлэхэд тусламж, зээлийн асуудлыг нь шийдэж өгөөч гэхээр Засгийн газрын шийдвэр гараад Сангийн яам нь биелүүлдэггүй. Тиймээс Сангийн яамны нбхдүүдийг өөрсдөө амьдралд ор. Нийслэлд орж ажилла. Нийслэлийн гэр хорооллоор явж зам, дэд бүтцийнх нь асуудал ямар байдаг юм. Амьдрал, зовлонтой танилц. Түүнээс биш нийслэлийн амьдрал, улсын төсвийг нягтлан бодогчийн нүдээр хараад бай гэж байгаа юм.

Нийслэлийн иргэдийн төлсөн татварыг буцаагаад орон нутаг руу хуваарилчихдаг. Хаа хамаагүй газар руу явуулдаг. Ингээд ирэхээр нийслэл өөрөө асуудлаа шийдвэрлэж чадахгүй байна.

-Сургуулийн автобус зах зээлээс хэд дахин үнэтэй байна гэдэг шүүмжлэл гараад байгаа. Таныг хотын даргаар ажиллаж байхдаа сургуулийн автобусыг оруулж ирэх тендер зарлаагүй гэсэн мэдээлэл байна. Үнэхээр тийм зүйл байгаа юм уу?

-Нийслэлийн замын түгжрэлийг багасгах, нийтийн тээврийн стандартын шинэчлэлийн таван чиглэлийн бодлогыг нийслэлийн Засаг даргаар ажиллаж байхдаа гаргасан. Нэгдүгээрт, автобусыг ажил хэргийн, бизнесийн, хүүхдийн, аялал жуулчлалын, экспресс зэрэг чиглэлээр ингэхдээ цахилгаан автобус явуулах бодлого гаргасан. Өдөрт 370 мянган төгрөгийн зардал гаргадаг байсан автобус өнөөдөр 30 мянган төгрөгөөр цэнэглээд хоёр өдөр үйлчилгээнд явж байна. Эхний ээлжиийн ажлууд хийгдээд эхэлсэн. Өнгөрсөн арваннэгдүгээр сард шийдвэр гарч сургуулийн 40 автобусыг 33 чиглэлд явуулсан. Үр дүнгээ өгсөн. Дахиад 200 автобусыг захиалж авъя гэж энэ жилийн төсөвт 20 тэрбум төгрөг суулгасан. Энэ хүрээнд 75 сургуулийн автобус худалдаж авсан гэдэг мэдээлэл надад ирсэн. Минихй бие УИХ-ын гишүүн болсон учраас гэрээ хэлцэл, нэг бүрийн үнийн талаар мэдээлэлгүй байна. Миний ойлгосноор 130 мянган ам.доллараар автобус худалдаж авсан асуудал байхгүй.

-Шинээр баригдаж байгаа Түлэнхийн төвийн Моргийн газарт орон сууцны барилга барьсан гэсэн асуудал яригдаж байна?

-Энэ талаар мэдэхгүй.

-Таны гарын үсэгтэй байсан шүү дээ?

-Би тэр эрхийг олгоогүй. Дахиж тодруулах шаардлагатай.

Б.Лхам