Эрүүл мэндийн дэд сайд Ж.Цолмон өнгөрсөн долоо хоногт ажил, албаа хүлээлгэж өгчээ. Өсвөр насны охидод хийсэн "Гардасил" вакцин хортой гэдгийг мэдсээр байж хийлгэсэн гэх хэл аманд тэрбээр өртөөд байсан. Өөрөө "Гардасил" нь ямар нэг сөрөг нөлөөгүй гэж баталсаар байгаа ч олон нийт итгэж өгөхгүй байгаа билээ. Энэ шуугиан дундуур Ж.Цолмон сайд ажлаа өгөхдөө "Би авах, өгөхөө мэддэг хүн" хэмээн тайлбарлажээ. Үнэхээр ч шинэ Засгийн газар гарч, яаманд шинэ сайд томилогдоод байхад хуучин Засгийн хүн ажлаа өгөх нь дамжиггүй. Төрийн албан хаагчид засаг солигдох бүрт хэрхэн байр суурь нь ганхдаг вэ гэдгийг хатагтай Ж.Цолмон ч өөрийн биеэр мэдэрчээ.