Монголын авто спорт мастеруудын холбооны намрын нээлтийн тэмцээн тодорхойгүй хугацаагаар хойшлогдоод байна. Морингийн даваанд өчигдөр эхэлсэн тэмцээний үеэр хэд хэдэн машин мөргөлдөж зарим нь онхолджээ.  Энэхүү тэмцээнийг "Хишиг арвин" компаний нэрэмжит болгон зохиож байсан аж. Уралдаанд Д.Болдбаатар, Ш.Гомбодорж, Б.Улам-Өрнөх зэрэг 50 орчим тамирчин оролцож байжээ.  Мөн ахмал мастерууд намрын нээлтийн уралдаанд хүндэтгэл үзүүлэн уралдахаар болсон гэх мэдээлэл байна. "Мастер кросс" тэмцээний үеэр төмөр хүлгүүд шүргэлцэх, мөргөлдөх, онхолдох нь бараг хэвийн үзэгдэл мэт байдаг. Гэтэл энэ удаа тэмцээнээ бүрэн зогсоож, тодорхойгүй хугацаагаар хойшлуулсан аж. Энэхүү мэдээлэл маш хаагдмал байгаа бөгөөд,  өнөөх осолд орсон хүнээ ч ил гаргахгүй байгаа юм.  Уралдааныг шууд дамжуулж байсан "ТV5" телевизийн үзэгчдэд мэдээлснээр, "уралдаанд оролцож байсан  машинууд мөргөлдөж, улмаар онхолдох үед нэг хүн машины цонхоор шидэгдэв" гэв. Тэр хүн хэн байсан нь тодорхойгүй байгаа бөгөөд энэ үед телевизийн бичлэгийг зогсоожээ.
Ингээд өгчидөр 16.00 цагийн орчимд осол гарсан гэх дуудлагаар яаралтай түргэн тусламжийн баг бүрэлдэхүүн Морингийн даваа руу хөдөлжээ. Гэтэл Монголын авто спортын холбооны холбогдох мэргэжилтнүүд "Манай байгууллагатай ямарч холбоогүй. Мастеруудын холбоо гээд байгууллагатай холбоотой" гэв. Харин Морингийн даваанд яг юу болоод байгаа талаар телевиз, радио, сонин хэвлэлээр мэдээлэхгүй байгаа нь сэжигтэй байна хэмээн оролцогчдын ар гэрийнхэн түгшиж байна.  Яаралтай түргэн тусламжийнхны мэдээлснээр дуудлагын дагуу очиход машин осолдсон гэх ул мөр байгаагүй ажээ. Ямартай ч энэ хэргийн цаана ямар нэг хэрэг нуугдаж байгаа нь тодорхой болоод байгаа бөгөөд энэ талаар олон нийтэд нээлттэй мэдээлэх хүн алга.