Нэгэн үе МАН (тухайн үеийн МАХН) гурван хүчирхэг “Дорж”-той байлаа. Ц.Нямдорж, Ж.Бямбадорж, Ц.Шаравдорж гэсэн гурван хуульч гишүүн МАН төдийгүй Монголын улс төрийн тодорхойлж байсан цаг саяхан. Гэсэн ч Ж.Бямбадорж нь Үндсэн хуулийн Цэц рүү, Ц.Шаравдорж нь МАН-аас салсан МАХН руу явснаар МАН-ын бууриа Ц.Нямдорж гишүүн л сахиж үлдсэн.

Цагтаа МАН-ын тэргүүн эгнээний хуульч гишүүнээр нэрлэгдэж явсан Ц.Шаравдоржийн хувьд МАХН буюу Н.Энхбаяр даргад үнэнч зүтгэдгээ сүүлийн хэдэн жил чамгүй харуулсан.

Нэр дэвших эрх нь хязгаарлагдсан намын даргаа өмөөрч мэдэгдэл хийгээд явдаг байлаа, тэр. Гэтэл өнгөрсөн УИХ-ын сонгуулийн үеэр л Н.Энхбаярын шадар “цэрэг” явсан Ц.Шаравдорж дарга гэнэт түүнээс нүүр бууруулсан. Сонгуулийн үеэр МАХН-ын дарга Н.Энхбаярын эсрэг үгс ч тэрбээр хэлж явсан. Үүний учиг өдгөө тайлагдаж эхлэж байх шиг байна.

Үүнийг өгүүлэхийн тулд манай сайт хоёр хоногийн өмнө мэдээлсэн “Г.Амартүвшин хөгжлийн банкны захирлаар ажиллах хугацаандаа Г.Дамдинням, Х.Ганхуяг нарт 33 тэрбум төгрөгийн зээл өгчээ” нийтлэлд дурдагдсан мэдээллээс нэгэн баримтыг хүргэе.

Энэ нийтлэлд Г.Амартүвшин гишүүнийг Хөгжлийн банкны Ерөнхий захирлаар ажиллах хугацаанд зээл авсан таван том зээлдэгчийг онцолсон. (Нийтлэлийг бүрэн эхээр нь https://www.24tsag.mn/a/189171  холбоосоор уншина уу)

Түүний нэг нь Ш.Билэгтэй захиралтай “Шанх майнинг” ХХК.

Зээлдэгч: - “Шанх майнинг” ХХК

Шийдвэр: – Шинээр зээл олгосон

Үндсэн зээлийн үлдэгдэл: - 5.600.000.000.00

Үйл ажиллагаа: - Барилга, авто зогсоол

Гол хувьцаа эзэмшигч: - Ш.Билэгтэй /Гандирс ХХК/

Энэ баримтаас харвал Ш.Билэгтэйн “Шанх майнинг” ХХК нь Хөгжлийн банкнаас сонгуулиас зургаан сарын өмнө 5.6 тэрбум төгрөгийн зээл авчээ. Харин энэ компанийн захирал Ш.Билэгтэйн хувьд УИХ-ын гишүүн асан, Тамгын газрын дарга асан Ц.Шаравдоржийн хүү юм.  “Шанх майнинг” ХХК нь Өмнөговь аймгийн Цогтцэций суманд баригдаж байгаа “Тээвэрчдийн хотхон” төслийг хэрэгжүүлэгч юм. Сонгуулийн өмнөхөн хүүд нь ингэж олон тэрбумын зээл олгосон нь Ц.Шаравдорж даргыг Н.Энхбаяраас, МАХН-аас “татгалзах” шалтгаан болсон бололтой.

С.Сүлд