Коронавирусний цар тахлын үеэр эрүүл мэнд, эдийн засаг хүнд байдалд байгаа ч асуудал дагуулж байгаа нь боловсролын салбар болоод буй. Цар тахлаас үүдэж, танхимын хичээлийг явуулахгүй, цахим хэлбэрт шилжээд нэлээд удсан. Үүнээс ч өөр арга зам байхгүй гэдгийг хэлэх хүн олон.

Харин БШУ-ны сайд Л.Энх-Амгалан бүх шатны сургуулийн хичээлийг гуравдугаар сарын нэгнээс эхлүүлэх саналтай байгаагаа УОК-т уламжлаад байсан.

Тэрбээр энэ талаараа “Гуравдугаар сарын 1-нээс анги, танхимаар хичээллэх зайлшгүй шаардлага байна. Сурагчид маш их хоцрогдолтой байгаа. Нэг хичээлийн жилд 165-180 хоног хичээллэх ёстой. Гэтэл өнгөрсөн онд 80 гаруй хоног цахим, теле хэлбэрээр хичээллэснээс болоод нийт сурагчийн 70-80 хувь нь хоцрогдолд орсон байна. Миний бас нэг санаа зовж байгаа зүйл бол цахим, теле хичээл орж байх үеэр 174 мянган хүүхэд гар утас, компьютергүй, интернэтийн сүлжээгүй газарт байна.  Улаанбаатар хотод гэхэд гэр нь цахилгаанд холбогдоогүй 30 мянган өрх байна гэдэг судалгаа бий. Тэдгээр өрхийн хүүхдүүдэд анхаарлаа хандуулъя гэж бодож байгаа.

КОВИД 19-ийн өндөр дэглэмтэй байгаа дэлхийн 130-аад улс орон ерөнхий боловсролын сургуулийн хичээлээ явуулж байгаа юм билээ. Тиймээс миний УОК-т илэрхийлсэн байр суурь, цаашлаад Засгийн газрын хуралдаанаар хэлэлцүүлэх асуудал бол гуравдугаар сарын 1-н гэхэд улс даяар танхимын хичээлийг явуулна” хэмээн мэдэгдээд байв.

Энэ нь ч олны анхаарлыг татаж, басхүү сэтгэлийг чилээгээд байсан билээ. Хэдийгээр гадны улс оронд танхимын хичээл орж байгаа ч үүнийг манай улс хөрсөн дээрээ буулгах боломж хомс гэдэг нь хэнд ч ойлгомжтой. Нэг хүүхдэд ноогдох зай талбай, агааржуулалт, ариун цэврийн асуудал гээд тулгамдах зүйл олон. Энэ талаар ч бид өмнө нь мэдээлж байсан. https://www.24tsag.mn/a/189893

Тэгвэл Шадар сайд, УОК-ын дарга С.Амарсайхан өөр цахим хуудсаараа дамжуулан хүүхэд багачууд, сурагчдад хандан эелдэг захидал бичиж, хичээлийг гуравдугаар сарын нэгнээс хичээлүүлэхгүй гэдгээ мэдэгджээ.

Түүний захидалд “Эрүүл саруул байх нь юу юунаас эрхэм, чин сэтгэл, хичээл зүтгэл байхад ямар ч хэцүү бэрх нөхцөлд эрдэм номыг шамдан суралцаж болдог” талаар дурдсан байна. 

Тэрбээр мөн захидалдаа "Зайнаас хичээллэх нь сурлагын чанарт сөргөөр нөлөөлж байгаа ч танхимаар хичээллэх боломж бүрдэх хүртэл хүүхдүүд та нарыгаа цахим, теле хичээлээ тогтмол үзэж, багшийнхаа өгсөн гэрийн даалгавраа цаг тухай бүрд нь хийж, ээж аав, ах, эгчээсээ тусламж зөвлөгөө авч, идэвх чармайлттай суралцахыг хичээнгүйлэн хүсье. Хүн өөрөө хичээж, цагийг зөв ашиглаж чадвал энэ цаг үе хүн бүрд боломж юм. Олон олон аавууд надтай адил эрсдэл бүхнээс үр хүүхдээ хамгаалж, эрүүл энх байлгахыг юу юунаас эрхэмлэж байгаа гэдэгт итгэж байна" гэдгийг онцолсон байна.  

Эх орныхоо ирээдүй болсон үрсийн эрүүл мэндийг эрхэмлэн дээдэлсэн түүнд алга ташин баяр хүргэе. Сайхан цаг ирж, эрүүл саруул болоход ирээдүй болсон үрс минь эрдэм номоо шамдан суралцах нь дамжиггүй.

Б.Баатар