ЦЕГ-ын Хэвлэл мэдээллийн төвийн дарга, хурандаа Т.Сайнжаргалтай цаг үеийн асуудлаар ярилцлаа.

 -Сүүлийн үед үйлдвэрлэлийн ослоос болж, иргэд амиа алдах, бэртэх хэрэг их гарах боллоо?
    ЦЕГ-ын Хэвлэл мэдээллийн төвийн дарга, хурандаа Т.Сайнжаргалтай цаг үеийн асуудлаар ярилцлаа.

 -Сүүлийн үед үйлдвэрлэлийн ослоос болж, иргэд амиа алдах, бэртэх хэрэг их гарах боллоо?

-Тийм. Сүүлийн 14 хоногийн дотор Нийслэлийн хэмжээнд барилгын компаниуд аюулгүй байдлын журам хангаж ажиллаагүйгээс дөрвөн хүний амь нас эрсэдсэн харамсалтай хэрэг гарлаа. Тиймээс цагдаагийн байгууллагаас Нийслэлийн хэмжээнд барилгын үйл ажиллагаа явуулж буй барилгын компаниудад мөн иргэдийн аюулгүй орчныг хангаж ажиллах талаар аж ахуйн нэгж байгууллагуудад мэдэгдэл хүргүүлэн ажиллаж байгаа. Харамсалтай нь аж ахуйн нэгж компаниуд цагдаагийн байгууллагаас хүргүүлсэн мэдэгдлийг хангаж ажиллах талаар тодорхой үр дүнтэй ажиллахгүй байна.

-Тэгэхээр цаашид ямар арга хэмжээ авах вэ?

-Нийслэлийн цагдаагийн газрын даргын захирамж гарсан байгаа. Тиймээс захирамжийн дагуу зөвшөөрөлгүй баригдаж буй барилга, хүний амь нас эрсдэж болзошгүй аюултай орчны талаар иргэдээс мэдээлэл авч байга. Зөвхөн нийслэл гэлтгүй хөдөө орон нутгийн цагдаагийн хэлтсүүдэд ч үүрэг чиглэл өгсөн. 

-Кранд даруулж амиа алдсан 10 настай охины хэрэг юу болж байна?

-Хэргийг Баянгол дүүргийн цагдаагийн хэлтэст шалгаж байгаа. Мөрдөн байцаалтын ажиллагаа явагдаж байна.

-Хэдэн хүнийг шалгаж байгаа вэ. Саатуулсан уу. Гадуур байцааж байгаа юу?

-Аюулгүй байдлын талбайн инженер, оператор, жолооч, техникч гэсэн дөрвөн хүнээс байцаалт авч шалгаж эхэлсэн. Эхэндээ саатуулан шалгаж байсан ч батлан даалтад гарсан. Тиймээс гадуур дуудаж байцаалт аван шалгаж байна.

-Солонгос иргэд байгаа юу?

-Үгүй. Дөрвүүлээ Монгол улсын иргэн. Солонгосын иргэнийг шалгаагүй. Учир нь тухайн барилгыг гүйцэтгэгч нар солонгосчууд байсан. Техникийг нь ажиллуулж байсан нь гурван монгол хүн байсан.

-Мөн “Тэнгис” кино театрын хажуугийн барилгаас хүн унаж амиа алдсан хэрэгт эрүүгийн хэрэг үүсгэсэн гэсэн. Гэвч “Эко констракшн” манай барилга биш гээд байгаа. Тэгэхээр аль байгууллагад эрүүгийн хэрэг үүсгэн шалгаж байгаа вэ?

-“Эко констракшн” энэ хэрэгт хамаагүй. Тус барилгын гүйцэтгэгчээр “Модун спеакэл” компани ажиллаж байсан. Тэгэхээр уг хэрэгт гүйцэтгэгч компанийн захирал, талбайн инженер, барилгын даамал холбогдох албан тушаалтнуудыг шалгаж байна.

-Үйлдвэрлэлийн ослоор мөн онцгой байдлын ажилтан амиа алдсан. Түүнчлэн “Рапид харш”-ын барилгад ажиллаж байсан 26 настай кранист амиа алдсан. Эдгээр хэрэг юу болов?

-Эрүүгийн хэрэг үүсгэн шалгагдаж байгаа.

-Ер нь хараад байхад үйлдвэрлэлийн ослоор амиа алдсан иргэдийн хэрэгт зөвхөн ажилтнуудыг нь шалгаад байх шиг байна?

-Үгүй. Зөвхөн ажилтныг биш. Талбайн инженер, захирал, хяналт тавих мэргэжлийн байгууллагуудын ажилтнууд зохих ёсоор хуулийн дагуу хяналт тавьж ажилласан уу гэдгийг шалган ажиллаж байгаа. Энэ асуудлаар Нийслэлийн Засаг дарга ИТХ-аас шалга гэсэн чиглэл ч өгөөд байна. Мөн ЦЕГ-ын тушаалаар бүх барилгууд барилгынхаа гадуур тор татахаар болж байгаа. Гудамж талбайд хүн явж байхад дээрээс нь юм унахгүй дэлгэсэн тор сүүдрэвч бариулах ажлууд хийгдэж байна. Уг нь энэ бол цагдаагийн байгууллагын ажил үүрэг биш. Үүнийг хийдэг төрийн тусгай албад, чиг үүрэг бүхий байгууллагууд бий. Гэвч тэр үүргээ биелүүлэхгүй байна. Тиймээс цагдаагийн байгууллагыг хамтарч оролцож, гэмт хэрэг гараад буй шалтгаан нөхцөл, аюулгүй байдлыг ханга гэсэн учраас цагдаагийн байгууллага хийж байна.

-Ер нь үйлдвэрлэлийн осол зөвхөн сүүлийн 14 хоногт ч биш. Байнга гардаг?

-Тийм. Зөвхөн энэ дөрвөн хэрэг ч биш. Барилга дээр ажиллаж байгаа хөлсний ажилчдын хөдөлмөр хамгаалал, аюулгүй ажиллагаа ерөөсөө хангагддаггүй. Мэргэжлийн бус хүмүүсийг хөлсний ажилчин гэж аваад зуурагч, төмөр таслагч машинд ажиллуулдаг. Тэгээд зааж зааварлахгүй, хөдөлмөр хамгааллын багаж, техникээр хангахгүй ажиллуулаад гар хөл, хурууг нь тасдсан, барилга дээрээс унаж бэртэж, амь насаа алдсан зөндөө хэрэг гардаг.

-Энэ бүхэнд цагдаагийн байгууллагаас хяналт тавьдаг биз дээ?

-Байгууллагууд нь тухайн үедээ үйлдвэрлэлийн осол гээд хэдэн төгрөг өгөөд амыг нь хаачихдаг. Тэгээд хөлсний ажилчид хаана хэнд хандахаа мэдэхгүй хэрэг нь дарагддаг. Харин зарим нэг нь эмнэлгийн үйлчилгээ авахаар гэмтлийн эмнэлэгт ханддаг. Тэр үед нь гэмтэлд байгаа цагдаагийн хэрэг бүртгэгч нар гэмт хэргийн шинжтэй гээд хөдөлмөрлөлийн үйлдвэрлэлийн осол биш гээд хэрэг үүсгэн шалгадаг. Түүнээс биш мэдэгдэхгүй, хаана хандахаа мэдэхгүй дарагдаад өнгөрдөг хэрэг өдөрт 1-2 гарч байна.