Ардчилсан намын дотоод сонгууль гуравдугаар сарын 28-ны өдөр болохоор тов гараад буй. Тус сунгаанд 10 гаруй хүн нэр дэвшихээ илэрхийлж, дэнчингийн мөнгөө цуглуулаад байгаа талаар бид мэдээлсэн билээ.

Тэгвэл нэр дэвшигчид чухам аль дансанд мөнгөө тушаахаа мэдэхээ болиод байгаа аж. Энэ талаар нэр дэвшигч Ц.Оюунгэрэл "Миний бие Ардчилсан намын даргын сонгуульд нэр дэвшихээ илэрхийлж, дэнчингийн мөнгөө бүрдүүлсэн. Надад туслаж, хандив өргөсөн хувь хүн, байгууллагад талархаж байгаагаа илэрхийлье.

Өнөөдөр дэнчингийн мөнгө цугларсан ч чухам аль дансанд мөнгөө шилжүүлэхээ мэдэхгүй сууж байна.

"Дэнчингийн мөнгөө тушаана уу" гэсэн зурвас, нэг данстай ирсэн. Харин би дэнчингийн мөнгийг хаана тушаах, тэр данс нь албан ёсных мөн эсэх, тамга тэмдэг нь улсын бүртгэлд бүртгэгдсэн  нь үү үгүй юу гэх мэт мэдээллийг ил болгохыг хүссэн. Учир нь дэнчинд цугларсан мөнгө нь надад итгэсэн олон түмний мөнгө учраас баталгаагүй дансанд шилжүүлэхийг хүсээгүй. 

Гэвч Ардчилсан намын Дотоод сонгуулийн хорооны мэдээлэлд энэ талаарх мэдээлэл огт алга байна" гэв.

Мөн тэрбээр "Улс төрийн босгыг хэт өндөр мөнгөөр тогтоох нь буруу. Энэ нь олон сайхан залуусыг амжилт гаргахад хаалт болж байна. Тиймээс ч Т.Энхсайхан нэрээ татах шиг боллоо. Үүнд харамсаж байна. Би нэрээ татахгүй. Эцэсээ хүртэл явна. Гэхдээ зардал мөнгө их гараад түүнд хүч хүрэхгүй бол дахин бусдаас хандив гуйх ёс зүй надад байхгүй.

Ардчилсан нам сонгуулийн зардлаа хямдруулж, танаж болох бүх зардлаа танах хэрэгтэй. Ардчиллын үнэ цэнийг мөнгөнөөс нь салгаж, хараат байлгахын тулд санхүүгийн нээлттэй байдлыг зарлаж байгаа юм. Ингэж байж цаашид улс төр хэт их мөнгө, бүлэглэлээс хараат байлгах боломжийг олгоно" гэлээ. 

Б.Баатар