Шадар сайд, УОК-ын дарга С.Амарсайханы гэргий Ч.Ичинхорлоо ХӨСҮТ-д хэвтэж байгаа аав, ээжийнхээ сахиураар очоод, тусгаарлагдалгүй буцаж гарсан талаар бид өмнө нь мэдээлсэн.

Тэгвэл энэ талаар Шадар сайд дахин тайлбар мэдээлэл өглөө. Тэрбээр "Өчигдөр хэвлэлийн хуралд дээр зарим хэвлэлийн байгууллагаас надтай хамааралтай асуудлаар асуулт асуусан учраас товч хариулсан. Манай эхнэрийн аав 100 хувийн асаргаанд байдаг. 80 гарсан хөгшин хоёулаа халдвар авсан. Халдвар хамгааллын дэглэмээ сахиж  ХӨСҮТ-д хүргэж өгсөн. ХӨСҮТ-өөс өгсөн зааврын дагуу өөрийгөө 14 хоног тусгаарласан. Хоёр, гурван удаагийн шинжилгээгээр хариу сөрөг гарсан. Манай эхнэр халдвар гарсан голомтдоо тусгаарлагдаж байгаа. Ахмад настнууд энэ халдварт өртөж байгаа би өөрийн биеэр мэдэж байна. Тиймээс ахмадуудаа халдвараас хамгаалаарай" гэх тайлбарыг өглөө.

Мөн тэрбээр "Манай гэр бүлийн хүн гэртээ очоогүй. Манай хадам аав, ээж хаанаас халдвар авсан нь мэдэгдэхгүй халдвар авсан. Манай эхнэр эмнэлэгт хүргэж өгсөн. Эмнэлэгт хүргэж өгөөд аав ээжийнхээ гэрт тусгаарлагдаж байгаа. Яагаад гэвэл халдвар гарсан голомтдоо тусгаарлагдах заавартай. Өнөөдрийн байдлаар гурван удаагийн шинжилгээ өгсөн. Өчигдрийн хариу нь сөрөг гарсан. Халдвар гарснаас хойш эхнэртэйгээ уулзаагүй байгаа. Өөрсдөө бид шинжилгээ өгч байгаа. Анхаарал болгоомж алдаж болохгүй учир байнга ПСР шинжилгээнд хамруулж байгаа. Жолооч, үйлчлэгээс эхлээд бүх хүмүүсээ шинжилгээнд хамруулж байна. 

Миний хувьд дүрэм журмыг хатуу барьж ажиллах ёстой. Тиймээс дүрэм журмынх нь хүрээнд асуудалд хандаж байгаа. Би өөрийн биеэр энэ асуудлыг мэдэрч байна. 

Би УОК-ын даргын ажлыг хоёрдугаар сарын сүүлээр аваад гуравдугаар сарын нэгнээс дүрэм журамд өөрчлөлт оруулсан. Шинж тэмдэг нь ойлгомжгүй байсан учир тусгаарлалтын хугацааг 21 хоног тавьдаг байсан. Сүүлийн үед бид дэлхий нийтэд мөрдөгдөж байгаа дүрэм, журмаас эхлээд эрдэмтэн судлаачид, эмч мэргэжилтнүүдийн зөвлөгөөний дагуу өөрчлөлт оруулсан. Тухайн үед мөрдөж байсан УОК-ийн дүрмийг буруу гэж хэлэхгүй. 

Би албан тушаалтай зууралдаад байхгүй, шаардлагагүй. Би өөрийгөө цар тахалтай тэмцэж байгаа гэж ойлгож байгаа. Монголын ард түмэн цар тахалтай тэмцэж байгаа. Цар тахлыг эрсдэл багатай давж гарахын тулд хэн ч байсан дүрэм журмаа мөрдөж, эрсдэлгүй байхыг эрхэмлэх ёстой. Зарим нэг явуулгатай, улстөржүүлж байгаа зүйл бий. Сонгуультай холбоод хөл хорио тавилаа, тавьсангүй гээд байгаа. Би 80 гарсан настай хөгшчүүлээ мэдэрч байгаа. Энэ бүхнээ олон нийтэд зарлаад байх шаардлагагүй. Манай гэр бүлийн хувьд ч гэсэн хэн ч өвчин туссан эцэг эх дээрээ очно, айлын охин, ээжийн охид ямар үүргийг бидний ард биелүүлж явдаг билээ. Тэр бүхнийг биелүүлж яваа. Залуучууд цар тахлын үед халдварын дэглэмээ сайн бариарай. Эрсдэлд хамгийн түрүүнд халдварт өртөж, амь насанд нь хохирол учрах хүмүүс ахмадууд байгаа. Тиймээс ч амны хаалтаа зүүж халдвар хамгааллын дэглэмээ баримтал гээд байгаа юм" гэдгийг хэллээ. 

Б.Баатар