Коронавирусний халдвар хэдийнэ хяналтаас гарч, цар тахлын хэмжээнд хүрээд буй. Ойрын хавьтал бүрийг тусгаарлаж, халдвар авсан хүн бүрийг толгой дараалан эмнэлэгт хэвтүүлэн эмчилж байсан цаг саяхан. Гэвч өдгөө ойрын хавьтал бүү хэл, халдвар авсан өвчтөнүүдээ ч эмнэлэгт хэвтүүлэн эмчилж дөнгөхгүй, гэрээр нь эмчилсэн болоод торгоож байна. Эрүүл мэндийн даатгалын сангаас гэрээр эмчлүүлж буй иргэдэд 70 мянган төгрөгийн багц олгохоор заасан. Гэвч энэхүү багц хүндээ хүрэхгүй, халдварын эмчилгээнд хэрэглэж буй эмийн  үнэ тэнгэрт хадаж,  бусдын зовлонгоор зоологсдын мэдээлэл өчигдөр олон нийтэд ил болов.   

Ж.Сүхбаатар: Эрүүл мэндийн сайд яагаад нөхцөл байдлын талаар хэлэхгүй нуугаад байна вэ?

УИХ-ын Хууль зүйн байнгын хорооны хуралдааны үеэр УИХ-ын гишүүн Ж.Сүхбаатар коронавирусний халдварын нөхцөл байдал хүндэрч зарим эм, витамины үнэ эрс өссөн талаар мэдээлэв.  Тэрбээр "Өнөөдөр маш олон иргэн коронавирусний халдвар авч, эмнэлгийн тусламж авч чадахгүй гэртээ өвдөөд байж байна. 119, эмнэлэг, шуурхай штаб руу залгаад утсаа авахгүй, холбогдохгүй, хариу өгөхгүй, эсвэл эргэж холбогдоно гээд таг алга болсон гэх гомдол мэдээлэл иргэдээс маш их ирж байна. Монгол Улсад иргэд өвдлөө гэхэд яг хэн рүү утасдахаа, тусламж авч чадах эсэхээ мэдэхгүй байна. Витамин, эмийн үнэ хэд дахин өссөн байна. Арбидол гэх эмийн үнэ 6000 байсан бол 30000 гарчихлаа гэж байна. Энэ асуудлаар Эрүүл мэндийн сайд яагаад нөхцөл байдлын талаар хэлэхгүй байгаа юм бэ. Эмнэлгийн ачаалал хэтэрчихлээ, одоо болохоо байсан шүү, эмчилж байгаа 5000 гаруй хүнээс 20 хувь нь маш хүнд, 80 хувь нь гайгүй байна. Орны зохион байгуулалтаа дэлгэх зэрэг асуудал бүрд тодорхой хариу өгөх ёстой" гэдгийг онцлов.

Б.Цогтгэрэл: Ард түмний өвчин зовлонгоор бизнес хийж, мөнгө олж байгаа албан тушаалтнууд, компаниудад хатуу хариуцлага тооцохыг шаардаж байна

Энэхүү мэдээллийн чимээ намжиж амжаагүй байтал "Шилэн" нэрээр олонд танигдсан Б.Цогтгэрэл “Арбидол эмийн төлбөрт Эрүүл мэндийн яамнаас 726,733,600 төгрөг төлсөн баримтыг ил болгож, ард түмний өвчин зовлонгоор бизнес хийж, мөнгө олж байгаа албан тушаалтнууд, компаниудад хатуу хариуцлага тооцохыг шаардав. Тэрбээр “Коронавирусээр халдварлаж өвдсөн иргэдийн эмчилгээ болон урьдчилан сэргийлэх зорилгоор хэрэглэж буй Арбидол эмийн үнэ өдөр ирэх тусам өсч байгаа тухай УИХ-ын гишүүн Ж.Сүхбаатар хатуу шүүмжилж байна. Энэ ч зөв. Учир нь, уг эмийн төлбөрийг татвар төлөгчид  бид түрүүлээд дөрөв, тавдугаар  сард гэрээ хийж, “Мөнхийн тун” ХХК, “Ач Үр” ХХК-иудад төлсөн байдаг. Уг баримтыг "Шилэн" Цогоо нь шилэн дансны баримтуудаар гаргаж ирсэн бөгөөд УИХ-ын гишүүн Ж.Сүхбаатарын шүүмжлэлтэй санал нэг байна. Ард түмний өвчин зовлонгоор бизнес хийж, мөнгө олж байгаа албан тушаалтнууд, компаниудад хатуу хариуцлага тооцохыг шаардаж байна” хэмээв.

Арбидол эмийн үнийг хэд дахин өсгөж зарах бизнес хэнийх вэ

Түүний дэлгэсэн баримтаар, Арбидол эмийн үнэ 1050 төгрөг аж. Энэ дүнгээр ч эмийн компаниудтай гэрээ хийжээ. Гэтэл өдгөө тус эмийг эмийн сангуудад 38 мянган төгрөгөөр зарж буй. Үүнийг ч УИХ-ын гишүүн М.Оюунчимэг хэлж, Эрүүл Мэндийн Даатгалын Ерөнхий Газрын дарга Л.Бямбасүрэнг улалзуулаад амжсан. Тэрбээр "Эмийн үнэ замбараагаа алдлаа. Ковидын халдвар авсан иргэдэд зориулсан багц эзэддээ очихгүй байна. Үүнд хэн хяналт тавих вэ. 70 мянган төгрөг эзэндээ очихгүй, хэнд хоол болоод байна гэдгийг тодруулахад Л.Бямбасүрэн “Коронавирусний халдвараар хөнгөн хэлбэрээр өвчилсөн иргэдийг гэрээр эмчлэхэд хүн нэг бүрд 70 мянган төгрөг олгохоор заасан. Энэ мөнгөн дүнд ямар ямар эм орохыг Эрүүл мэндийн сайдын тушаалаар баталсан. Тухайн хороо, сумын өрхийн эрүүл мэндийн төв гэрээр эмчлүүлж байгаа иргэдийнхээ мэдээллийг манай руу ирүүлэх учиртай. Бид үүнийг үндэслэж, эхнээс нь 70 мянган төгрөгийг олгох гэж байгаа. Одоогийн байдлаар өрхийн 89 эмнэлгээс гэрийн тусламж үйлчилгээ үзүүлсэн иргэдийнхээ мэдээллийг ирүүлсэн. Харин гэрээр эмчлэгдэж буй иргэдийн эмчилгээнд зориулсан эмийг өрхийн эмнэлгүүдэд хүргүүлсэн” гэх хариултыг өгсөн. 

Нэг үгээр хэлбэл, коронавирусний цар тахлаар тэд бизнес хийжээ. Үүнд тавьж буй хяналт алга. Тодруулж  хэлбэл, Эрүүл мэндийн сайд С.Энхболд энэ бүхэнд “Нүдэн балай, чихэн дүлий” явсны “гор”.

Ч.Эрдэнэбилэг: Ямар эмийг хэдэн төгрөгөөр борлуулахаар зөвшөөрөл авсныг өөрсдийн албан ёсны хуудсаараа дамжуулан мэдээлнэ

Байдал иймдээ тулж, үнэн илчлэгдэх үед ЭМЯ-ны Төрийн нарийн бичгийн дарга Ч.Эрдэмбилэг “ЭМЯ-ны Эмийн зөвлөл өчигдөр хуралдсан. Эхний ээлжид тэдгээр ААН-үүд нэг удаагийн импортын лицензээр оруулж ирэхдээ мэдүүлсэн мэдүүлгийг олон нийтэд нээлттэй болгоно. Өөрөөр хэлбэл, ямар эмийг хэдэн төгрөгөөр борлуулахаар зөвшөөрөл авсныг өөрсдийн албан ёсны хуудсаараа дамжуулан мэдээлнэ” хэмээн хээвнэг хариулт өгөөд суух.

Б.Ууганбаяр: Зах зээлд борлуулж буй эм нь аж ахуйн нэгжийн үнээ тогтоож борлуулах асуудал учир яамтай хамаагүй

Эрүүл мэндийн яам нь гэрээ хийж, мөнгө шилжүүлсэн баримт ил болоод байхад тус яамны хэвлэлийн төлөөлөгч Б.Ууганбаяр нь бидэнд хамаагүй гэх тайлбар хийжээ. Тэрбээр  "Арбидол эмийг ЭМЯ нь Ковид-19 өвчний эмчилгээнд ашиглаж буй бөгөөд дээрх Ач үр ХХК-иас авсан эм нь 100 мг-тай Арбидолын 103,104 гэсэн хоёр гэрээний 50 хувь нь 134,970,000 буюу /300,000 ширхэг эмийг нэгийг нь 899.8 төгрөг = 269,940,000

Харин 200мг-тай Арбидолын 75 дугаар гэрээ нь 237,500 ширхэгийг нэгийг нь 1799.6 = 427,405,000 болсон юм. Энэ эмийг эмнэлгүүдэд тарааж эмчилгээнд ашигласан юм. Зах зээлд борлуулж буй эм нь аж ахуйн нэгжийн үнээ тогтоож борлуулах асуудал учир яамтай хамаагүй" гэжээ .

Энэ бүхэн нь өнөөгийн эрүүл мэндийн салбар ямар хэмжээнд ажиллаж буйг илтгэх. Бүхэл бүтэн салбарын асуудал “надад падгүй” гэх үгээр хаалганы цаана, хариуцлагаас мултрах шалтаг болохгүй нь гарцаагүй.

Б.Баатар