Үндэсний их баяр наадамд хурдан морь унах хүүхдүүийн эрх зөрчигдөж, халдвар авах эрсдэл өндөр байгаа талаар бид өмнө нь мэдээлж байсан билээ. Тэгвэл Хүний эрхийн Үндэсний Комиссоос Ерөнхий сайд Л.Оюун-Эрдэнэд ханджээ.

Тодруулбал, коронавирусний цар тахалтай холбоотойгоор хурдан морь унаач хүүхдийн амь нас, эрүүл мэнд, дээд эрх ашиг, язгуур эрхийг хамгаалах зорилгоор энэ оны Үндэсний их баяр наадмын хурдан морины уралдааныг цуцлах, хойшлуулах санал, зөвлөмжийг Хүний эрхийн Үндэсний Комиссоос гаргасан байна.

Уг зөвлөмжид, "Цар тахалд хүүхдүүд олноор өртөж, өвчлөл өндөр байгааг дурдахын зэрэгцээ 2021 оны зургаадугаар сарын 11-нд Архангай аймгийн Хайрхан суманд өөрийн морийг хөлсөлж байсан 11 настай хүүхэд мориноос унаж, 50-100 метр газар чирэгдэж, бэртэл гэмтэл авсан. Одоогоор тухайн хүүхдийн биеийн байдал хүнд, эмнэлэгт хэвтэн эмчлүүлж байгаа аж. Түүнчлэн 2021 оны зургаадугаар сарын 13-нд Төв аймгийн Аргалант суманд 12 настай хүүхэд моринд чирэгдсэний улмаас гэмтэл авч, анхан шатны тусламж авч чадаагүйгээс нас барсан зэрэг харамсалтай тохиолдлууд гарсан байна" гэжээ. 

Б.Баатар