Одоогоос сар гаруйн хугацааны өмнө Цагдаагийн харьяа Дотоод цэргийн штабын дарга, бригадын генерал С.Ганбатыг сүр дуулиантай баривчилж, гэрт нь нэгжлэг хийсэн. Түүний гэрээс нэгжлэг хийх үеэр их хэмжээний бэлэн мөнгө буюу 500 мянган ам.доллар олдож, эд мөрийн баримтаар хураан авсан байдаг.

Гэхдээ түүнийг баривчлах шалтгаан нь дээрх мөнгөтэй холбоотой асуудал биш гэж ярьдаг юм. Харин Эрүүгийн цагдаагийн газрын даргаар ажиллаж байх үеийнхээ материалыг гэртээ хадгалж байсан, мөн хууль бусаар гүйцэтгэх ажиллагаа, мөрдөн шалгах ажиллагаа хийсэн байж болзошгүй асуудлаар сатуулсан гэдэг.

Түүний хувьд Ерөнхийлөгч асан Х.Баттулга, УИХ-ын дарга Г.Занданшатар нартай ойрын дотно гэлцдэг. Энэ утгаар Ерөнхийлөгч асан Х.Баттулга буухаасаа өмнө бригадын генерал цолоор шагнасан гэдэг юм.

Тэрбээр цагдаа, дотоодын цэргийн байгууллагад тасралтгүй 35 жил ажиллаж байгаа бөгөөд цагдаа, дотоодын цэргийн байгууллагаас төрөн гарч буй 16 дахь генерал.

Бригадын генерал цол хүртээд удалгүй асуудалд нэр холбогдон баривчлагдсан нь олны анхаарлын төвд байгаа бөгөөд уг хэрэг ямар шатанд яваа талаар иргэд чих тавин сууна. 

Ер нь хуулийн байгууллагынхан улс төрийн хүрээллийнхнийг сүр дуулиантай баривчилдаг ч асуудал хэрхэн шийдэгдсэн нь тодорхойгүй явсаар сураг алдраад дуусдаг ийм жишиг бараг тогтож. Бригадын генерал С.Ганбатын гүйцэтгэх ажиллагаа явуулж, гэртээ сая доллар хадгалж байсан С.Ганбат генералын хэрэг юу болсон бэ. 

Б.Лхам