Төрийн шагналт, СГЗ, нэрт зохиолч, сэтгүүлч Шагдарсүрэнгийн Гүрбазар хүнд өвчний улмаас таалал төгсөж, түүний уран бүтээлээр өсөж, үгээр нь уярч, нийтлэл, шүлэг, дуугаар нь амьдралаа тольдож ирсэн олон мянган уншигч, үзэгчид эмгэнэн гашуудаж байна.
Сошиал орчин даяар хүмүүс түүний тухай дурсамжаа хуваалцаж, эмгэнэлийн үгс бичиж, уран бүтээлийг нь дахин нийтэлж буй энэ өдрүүдэд ССАЖЗЯ-ны нийтэлсэн “эмгэнэл” олон нийтийн бухимдлыг төрүүлэв.
Алдаатай эмгэнэл гаргасан ССАЖЗЯ-ны хэвлэлийн албаны дарга И.Сарангэрэл гэгчийн боловсрол, ажлын туршлагыг харахад “Сэтгүүлч” дээд сургуульд долоон жил суралцаж, сэтгүүлч мэргэжил эзэмшжээ. Мөн хэвлэл мэдээллийн салбарт ч ажиллаж байсан туршлагатай нэгэн аж.
Гэвч Монгол хүн бүрийн мэддэг О.Дашбалбарын “Амьддаа бие биенээ хайрла” “Тэнгэр шиг бай”, Б.Лхагвасүрэнгийн “Ижийтэйгээ байхад би баян байсан” шүлгийг хүртэл андуурч, төрийн яамны албан ёсны эмгэнэлд хольж, сольж бичсэн нь өөрөө ЭМГЭНЭЛ байв.
Салбарын сайд Ж.Алдаржавхлан “Алдаатай эмгэнэл оруулсан хүмүүст хариуцлага тооцно. Би гадаад томилтоос буцаж явна” гэж өөрийгөө өмөөрсөн тайлбар хийгээд амжсан. Гэвч энэ асуудал зөвхөн дотооддоо хариуцлага тооцоод өнгөрөх хэмжээний зүйл биш. Монголын утга зохиолын нэрт найрагчид, Ардын уран зохиолчийн сор бүтээлүүдийг хольж, сольж бичсэн нь соёлын салбарын боловсон хүчний доройтол, мэргэжлийн бус томилгоо, улс төрийн шахаа ямар түвшинд хүрснийг олон нийтэд илчилсэн үйл явдал боллоо.
Тодруулбал, ССАЖЗЯ-ны Хэвлэлийн албаны дарга И.Сарангэрэл нь тус яамны сайд Ж.Алдаржавхланг Хан-Уул дүүргийн Засаг даргаар ажиллаж байх үед ХУД-ийн 1-р хорооны Засаг даргаар ажиллаж байсан нэгэн. Өөрөөр хэлбэл салбарын мэдлэг, мэргэжлийн чадвараас илүү улс төрийн холбоо хамаарал, дарга өөрийн үнэнч “цэрэг”-ээ дагуулж ирдэг тогтолцооны жишээ нь энэ болов.
Түүнчлэн “И.Сарангэрэл нь хорооны Засаг даргаар ажиллаж байх үедээ огт ажиллаагүй хүмүүсийн нэр дээр цалин бичиж завшсан байж болзошгүй” асуудлыг нийслэлийн прокурорын байгууллагаас шүүхэд шилжүүлсэн гэх мэдээллүүд цахим орчинд гараад эхэлжээ.
Т.Зузу
