Булган аймгийн Засаг дарга Б.Ариун-Эрдэнийг хүний наймааны хэргээр ял эдлэж байсан найзыгаа төрийн албанд томилсон талаар бид өмнө нь мэдээлсэн билээ. 

Тэгвэл Булган аймгийн Засаг дарга Б.Ариун-Эрдэнэ тус аймгийн Нөөцийн газрын даргаар томилсон өөрийн дотны найз Г.Батдэлгэрийгээ шүүхээс гэм буруутай нь тогтоогдон ял эдэлж байсныг мэдээгүй гэнэ.

Тэрбээр энэ талаар "Та бүхэндээ энэ оройн мэндийг хүргэе. Өнөөдөр миний томилгоотой холбоотой асуудал цахим орчинд нэлээн шуугиан тариад байх шиг байна. Г.Батдэлгэрийг албан ёсоор томилсон зүйл байхгүй. Учир нь энэ албан тушаалд томилох албан тушаалтны материалыг АТГ хянан шалгасан тухай бичиг ирсэний дараа томилдог учиртай.

Ямар хэрэг хэзээ үйлдсэнийг нь би мэдэхгүй. Нутаг орондоо ажиллаж амьдрах хүсэлтэй залуучуудыг би үргэлж дэмжинэ. Тэгээд ч бид хүмүүсийг сайн муугаар нь ялгаж харьцдаг хүмүүс биш. Аав нь өндөр настай, ээж нь бурхны оронд залраад удаагүй байгаа. Сэтгүүлч нар ч өөрийн гэсэн амьдралтай хүмүүс шүү дээ. Монголчууд бие биенээ хэмлэж биш хайрлаж, урам өгч амьдрах ёстой гэж боддог доо" хэмээн өгүүлжээ. 

Түүнийхээр бол дотны найзыгаа ял эдлэж байсныг мэдээгүй дээрх томилгоог хийх гэж байгаа аж. Мөн нутаг орондоо ажиллаж амьдрах сонирхолтой л бол ял эдэлж байсан нь хамаагүй бололтой. 

Хэдийгээр Төрийн албанд томилогдох хүмүүсээс ял шийтгэлийн тодорхойлолтыг шаардахаа больсон ч гэлээ хүний наймаа, охид эмэгтэйчүүдийг санаатайгаар хил давуулан худалдаалж, биеийг нь үнэлүүлдэг байсан этгээдийг төрийн албанд, даргын сэнтийд залах нь угаасаа ёс зүйгүй үйлдэл гэдгийг Б.Ариун-Эрдэнэ дарга эрх биш мэдэж байгаа байлтай. 

Булган аймгийн Засаг дарга Б.Ариун-Эрдэнэд эргэн сануулахад,  Г.Батдэлгэр нь 2007-2008 онд ганцаараа болон бусадтай хамтран нэр бүхий 13 эмэгтэйг гадаад улсад гаргаж, биеийг нь үнэлүүлэх зорилгоор бусдад худалдсан болох нь нотлогдож улмаар 2012 оны дөрөвдүгээр сарын зургааны өдөр Сүхбаатар дүүргийн шүүхийн Эрүүгийн шүүхээс 5.6 жилийн хорих ялаар шийтгүүлж байсан Шүүхийн шийтгэх тогтоол нь Шүүхийн мэдээ буюу Shuukh.mn сайт дээр нийтлэгдээстэй байгаа юм.  

Хэдийгээр Г.Батдэлгэр гэгчид уй гашуу тохиолдсон ч гэлээ энэ нь түүнийг зөвтгөх шалтгаан болохгүй нь ойлгомжтой. Тэрбээр бусдын охин үрсийг хил дамнуулан худалдаалж, биеийг нь үнэлүүлж байхдаа ард нь байгаа аав, ээж, алаг үрсийг нь хайрласан уу гэдэг бас л эргэлзээтэй. 

Ямартай ч төрийн алба, танилын алба, тал засах албан тушаал байх ёсгүй. 

Б.Баатар