Хууль зүйн байнгын хороо үйл ажиллагааны тайланг танилцуулж байна. “Инновац цахим бодлогын байнгын хороотой хамтарч гурван хууль баталсан. Тухайлбал, нийтийн мэдээлэл ил тод байдал, мэдээлэл авах хууль 2011 онд батлагдсан хууль. Энэ хуулиар төрийн байгууллагын ил тод байдал, төсөв санхүүгийн ил тод байдал, хүний нөөцийн ил тод байдал, төрийн болон орон нутгийн өмчийн хөрөнгөөр бараа үйлчилгээг худалдан авах ажиллагааны ил тод байдал гэсэн хүрээнд мэдээллийг нээлттэй байлгахаар заасан. Гэсэн хэдий ч төрийн байгууллагууд мэдээллийг харилцан адилгүй тавьдаг.

Зарим мэдээллийг албаны мэдээлэл гэж нуудаг. Иймээс төрийн мэдээлэл ил тод байх ёстой гэсэн үүднээс энэ хуулийн төслийг өргөн барьсан. Мөн таван төрлийн 68  мэдээллийг ил тод байлгаж, үргэлж шинэчилж байхыг хуульчилсан. Тухайлбал, төрийн байгууллага ажлын байрны сул орон тоог нээлттэй зарлах, тендерийн мэдээлэл ил тод байх, Улсын зардлаар оюутнууд гадагшаа сурдаг зэрэг асуудлыг ил тод байлгахаар хуульд заасан. Харин гэмт хэрэг зөрчил шалган шийдвэрлэх, шүүхийн шийдвэр гүйцэтгэх явцад цуглуулсан мэдээлэл, төрийн хяналт шалгалтын явцад цуглуулсан мэдээлэл, үнэт өв, соёлтой холбоотой зэрэг мэдээллийг хаалттай байхаар шийдвэрлэсэн. Өөрөөр хэлбэл, хаалттай мэдээлэл нь цөөн, бусад бүх мэдээлэл нээлттэй байхаар хуульд тусгасан. Төр өөрт байгаа  мэдээллээ иргэн  хуулийн этгээдээс шаардахгүй. Ингэснээр төрийн албан хаагчдын хүнд суртал гаргадаг, өөрт байгаа мэдээллээ иргэнээс шаарддаг зүйл байхгүй болно. Мөн хүний хувийн мэдээлэл хамгаалах тухай хууль, цахим гарын үсгийн тухай хууль, эрүүгийн хэрэг хянан шийдвэрлэх хуульд өөрчлөлт оруулах тухай хуулиудыг баталсан” гэв.

Д.Батчулуун