2021-2022 оны хоёрдугаар улирлын хичээлийг хоёрдугаар сарын 14-с эхлүүлэх Засгийн газрын шийдвэр гарсан. Үүнтэй холбоотойгоор хичээлийн хоцрогдол арилгах төлөвлөгөөг боловсруулсан тухай хэвлэлийн хурал хийлээ. Энэ үеэр Боловсрол, Шинжлэх ухааны сайд Л.Энх-Амгалан мэдээлэл өглөө. Тэрбээр “Өнгөрсөн есдүгээр сарын 1-ны өдөр хичээл эхлүүлсэн. Есдүгээр сарын 1-нд хичээл эхлүүлэхэд хамгийн гол нөлөөлсөн хүчин зүйл бол дархлаажуулалт байсан. Багш нар болон 12-17 насны хүүхдүүдийг сайн вакцинжуулсан. Мөн хүүхдийн дунд өвчлөл бага байсан тул Засгийн газар шийдвэр гаргаж хичээлээ эхлүүлсэн. Эхлүүлэхдээ 5,9-ийн зарчмаар зохион байгуулсан. Энэ арга маш зөв арга байсан. Эрдэмтдийн судалгаагаар танхимаар, цахимаар, хосолсон гэсэн гурван хэлбэрээр зохион байгуулсан. Танхимаар 469 сургуулийн 223 мянган сурагч, 365 сургуулийн 478 мянган сурагч, 8 сургуулийн 12 мянган сурагч хамарсан байна. Хичээлийн нэгдүгээр улиралд 73 цэцэрлэг, 413 сургуульд халдвар илэрсэн. Сургууль цэцэрлэг голомтолж гараагүй. Энэ нь 5,9-ийн зарчим үр дүнтэй байсан гэдгийг харуулж байна. НҮБ-аас сургууль цэцэрлэгийг хааж болохгүй, хичээл сургуулийн танхимаар хичээллүүлэх тухай зөвлөмжийг ирүүлсэн.

Мөн хичээлийн жилийн эхэнд хоцрогдлын үнэлгээ болон нэгдүгээр ангид элсэгч нараас сургуульд бэлтгэгдсэн байдлын гарааны оношилгоог хийсэн. Хоёр жилийн хугацаанд сургууль завсардсанаас сурагчид болон эцэг эхчүүдэд ихээхэн стресс үүссэн. Дөрвөн сурагч тутмын нэг нь сэтгэлээр унасан, ганцаардсан, айдаст автсан байсан нь судалгаагаар тогтоогдсон тул сургуулиудад мэргэжлийн сэтгэл зүйч нар ажиллуулж эхэлсэн. Энэ жилдээ багтаж ерөнхий боловсролын бүх сургуулийг сэтгэл зүйчтэй болгохоор ажиллаж байна" гэлээ.

Д.Батчулуун