"Урмыг нь хугалахаар, ууцыг нь хугал" гэх үг бий. Гэтэл зарим улсын цолтой бөхчүүд олны хүндлэл, итгэл сэтгэлийг умартаж, энд тэнд сөхөрч яваа нь туйлын буруу үзэгдэл. Муу нэрийг хусавч арилахгүй, сайн нэрийг хүсэвч олохгүй гэдэг зүгээр ч нэг үг биш л дээ. 

Цахилгаан Зоригоо хэмээгдэн олонд хайрлагдсан, наадмын өндөр даваанд үргэлж харуулдуулсан "Улсын үнэн зоригт харцага" Б.Зоригтбаатар "захиалгат" Зоригоо болсон бололтой. 

Өчигдөр болсон Дорноговь аймаг байгуулагдсаны түүхт 94 жилийн ойн цол олгох барилдаанд ам авах үедээ "О.Зундуйгаа авах уу" гэхэд нь бодсон дүртэй авч байгаа юм. Ид иртэй, залуухан харцага ийм зүйл рүү хөл халтирвал эргэж сайн нэрийг олох нь юу л бол.

Монгол бөхийн хийморь лундаа, мөн чанар, өв соёл, наанадаж хүний өөрийн хүсэл тэмүүлэл нь чангаадаггүй юм уу. Аймаг, сумын наадамд очиж холион бантан хутгаж, олны сэтгэл рүү ус цацахдаа зарим бөхчүүд юу боддог юм бэ. Бөхчүүд өөрсдийнхөө үйлдэл, итгэл үнэмшлээ эргэцүүлж, сайн тунгаах цаг нэгэнт иржээ.

М.Гал