Донойн нисэх онгоцны буудал 1956 оноос эхтэй. 2002 он хүртэл тодорхой оноосон нэргүй “Завхан аймгын нисэх онгоцны буудал” гэж явсан бол 2002-2021 он хүртэл Донойн хөндийгөөр нэрлэх болжээ. Харин Иргэний Нисэхийн Ерөнхий газар, Завхан аймгын ИТХ-ын Тэргүүлэгчдийн шийдвэрээр энэ оноос эхлэн Донойн нисэх буудлыг “Отгонтэнгэр нисэх буудал” гэж нэрлэх болжээ.

Энэ талаар ИНЕГ-ын харьяа Отгонтэнгэр нисэх буудлын дарга Д.Алтан-Уулаас тодрууллаа. “Бид аялал жуулчлалыг өргөжүүлэх, жуулчдыг татах зорилгоор Отгонтэнгэр хайрханы нэрээр өөрчлөх нь зүйтэй юм байна гэж үзсэн Завхан аймгын иргэд, нисэх буудлын ажилчдын хүсэлтээр аймгын ИТХ-ын Тэргүүлэгчид хүсэлт гаргасан. Ингээд 2021 оны зургаадугаар сарын 16-нд нисэх буудлын нэр өөрчлөх тухай тогтоол гарснаар баталсан юм. Өнгөрсөн 10 дугаар сард Нисэхийн салбарын гэрчилгээгээ гардаж авсан. Ингээд энэ оны нэгдүгээр сарын 1-ээс эхлэн Отгонтэнгэр нисэх буудал нэрээр үйл ажиллагаагаа үргэлжлүүлж байна” гэв.

Т.Мөнхжаргал