Архангай аймгийн Онцгой байдлын газрын Эрэн хайх, аврах салбарын усчин-аврагч, ахлах ахлагч Р.Оргилсайхан нь 2021 оны  “Шилдэг зүтгэлтэн”-ээр шалгарч, шагналаа гардан авчээ. Тэрээр Онцгой байдлын байгууллагад 20 дахь жилдээ үүрэг гүйцэтгэж байгаа юм.  Энэ хугацаанд ой хээрийн  түймрийн 153 удаагийн дуудлагаар 725 хоног, хүн малын гоц халдварт өвчний үеийн голомт, харуул хамгаалалт, хорио цээрийн дэглэм сахиулах ажилд 50 удаа 510 хоног, техникийн гаралтай осолд 18, үер, усны  дуудлагаар 200 гаруй удаа үүрэг гүйцэтгэж 400 гаруй хүний амь насыг авран хамгаалжээ.  Мөн ард иргэд, аж ахуйн нэгж, байгууллагын 34 гэр, 56 хашаа саравч, 9767 гаруй мал сүргийг ой, хээр, үер, усны аюулаас хамгаалж, 56 сая төгрөгийн эд хөрөнгийг авран хамгаалсан шилдэг алба хаагчдын нэг юм гэж Архангай аймгийн Онцгой байдлын газраас мэдээллээ.