Сар шинийн дараа шинийн 8, 15-ны дотор Шилийн Богд, Алтан-Овоонд очихоор дотоодын аялагчид Сүхбаатар аймгийн Дарьганга сумыг зорих болсон. Энэ жилинй хувьд одоогоор 5000-аад хүн Дарьгангын байгалийн цогцолборт газрыг зорьж очсон гэсэн мэдээлэл байгаа. Харамсалтай нь Дарьгангын цогцолбор газрыг зорьсон дотоодын аялагчид уул овоонд идээ будааны дээж өргөхдөө хог хаягдал ихээр үүсгэж, хөшөө дурсгалыг сүү, цагаан идээгээр бохирдуулаад буй. Үүний нэг нь тус цогцолбор газарт байдаг Торой бандийн хөшөөг сүүгээр будаж халтартуулсан зургийг уншигч Та цахим сүлжээгээр харсан байх. Тэгвэл бохирдсон хөшөөг хэсэг залуус угааж, цэвэрлэж өнгө зүсийг нь сэргээжээ.

Дарьгангын байгалийн цогцолборт газрын хамгаалалтын захиргаанаас аялагчид, нутгийн иргэдийг байгаль дэлхийгээ бохирдуулахгүй байхыг уриалж байгаа билээ.

Б.Жаргал