-Байгаль орчны салбарыг бусад салбараа тэргүүлэн бодлогоо зохицуулах ёстой гэж үзээд ногоон хөгжлийн үзэл баримтлалтай хослуулан тэргүүлэх чиглэлийн яам болголоо шүү дээ. Яахав, цоо шинээр суулгаж байгаа гэдгээрээ, Ногоон хөгжлийн үзэл санааг төлөвшүүлэх асуудалд нэлээд анхаарал хандуулж байгаа. Шинэ юм болгон саад бэрхшээл туулдаг. Гэхдээ бид ажлыг заавал хийнэ. Өнөөдөр дэлхийд хөгжлөөрөө тэргүүлж байгаа том гэгддэг орнууд энэ ногоон хөгжлийн үзэл санааг бүгд хүлээн зөвшөөрөөд хэрэгжүүлэх шатандаа явж байна. Тэгэхээр бид энэ эдийн засгийн, үзэл баримтлалын, соёлын маш том хувьсах өөрчлөлтөөс хоцорч болохгүй. Ногоон хөгжлийн үзэл баримтлалыг манай яам эхлүүлж байна, цаашлаад бусад салбарын тэргүүлэх зорилт болох ёстой. Байгаль орчин, ногоон хөгжлийн сайдын хувиар энэхүү хөгжлийн шинэ үзэл санааг монголынхоо хөрсөн дээр буулгах ажлыг чухалчилна даа.

-Өнөөдрийн байдлаар байгаль орчны салбарт хамгийн ихээр тулгамдаж байгаа ямар асуудал байна вэ?

-Хүн өөрөө байгалийн амьтан шүү дээ. Тийм ч учраас иргэдийн болоод нийгмийн анхдагч хэрэгцээг хангадаг гэдэг утгаараа манай салбарт чухал биш, тулгамдаагүй асуудал гэж байхгүй. Манайхан л усны нөөцийн асуудал юм уу, уул уурхайгаас үүдэлтэй эвдрэл сүйдлийн талаар арай илүү мэдээллээд, түүндээ анхаарлаа хандуулаад байгаа болохоос бүгд л чухал сэдэв. Зүгээр миний анзаарч байгаагаар салбар хоорондын ажлын уялдаа жаахан тааруу байдаг тал байх шиг байна. Салбар хооронд гэлтгүй заримдаа дотроо хүртэл ойлголцоогүйн улмаас ажил удаашрах, үр дүн нь буурах зэрэг дутагдлууд гардаг шүү дээ. Тиймээс аливаа бодлогын хэрэгжилтийг хангуулахдаа ажлын уялдаа холбоог нэлээд сайжруулах,  боловсон хүчний чадавхийг сайжруулах зэрэг дээр анхаарна гэж бодож байгаа.


-Шинэ засгийн газар амралтын өдөр ажиллаж байгаа. Хагас сайн өдөр ажиллах нь эмэгтэй сайдуудад ар гэртээ цаг зав гаргахад хэцүү болгож байгаа байх. Ар гэрийнхээ ажлыг хэрхэн зохицуулж байна, жишээ нь хүүхдийнхээ эцэг эхийн хуралд хэр идэвхтэй очиж байна?

-Нэгэнт Засгийн газрын бүрэлдэхүүнээрээ ажиллаж байхад эмэгтэй гэдгээрээ ажлаас хойш сууна гэж байхгүй. Сайдууд бүгдээрээ л ялгаагүй хагас сайн өдөр ажиллаж байгаа. Бүтэн сайн өдөр харин гэр бүлдээ цаг заваа бүрэн зориулахыг хичээдэг. Ням гарагаас бусад өдөр хүүхдүүдийг маань аав нь, бас хамаатны эгч нь анхаардаг даа.

-Байгаль орчны яаманд хяналтын эрхийг нь шилжүүлэх тухай яригдаж байгаа чимээгүй болчихлоо. Энэ ажил юу болсон бэ?

- Ер нь бол хяналтаа авах ёстой. Намайг анх ажил авахад манай ахмадууд хүртэл энэ талаар л эхэлж хөндсөн. Газрын мэдэл байхгүй, хяналтын ямар ч эрхгүй, тэгээд байгаль хамгаална гэдэг шүдгүй хүн мах зулгаахтай л адил зүйл.  Хяналтгүйгээр хамгаална гэдгийг зүгээр л оромдох гэхээс өөрөөр нэрлэх аргагүй. Одоо бол яг ийм байдалд л байгаа. Тэнд нэг уурхай хууль зөрчлөө гэхэд яам Мэргэжлийн хяналт, цагдаа, орон нутаг гуравт албан бичиг явуулахаас өөр ажилгүй сууж байх жишээтэй. Нэгэнт л бодлогоо хэрэгжүүлэх гэж байгаа бол цогц байдлаар хандах ёстой, ялангуяа байгаль орчинд. Энэ бол өөрөө маш онцлогтой салбар шүү дээ. Анх Засгийн газрын бүтцийг ярьж байхад энэ асуудал бас хөндөгдсөн. Цаашдаа гол гол чиглэлийн яамдад хяналтын эрхийг нь өгөх нь зөв.

-Бусад эмэгтэй гишүүдтэйгээ хэр гар нийлж ажиллаж байна вэ?

-Парламент дахь эмэгтэйчүүдийн бүлэг нэлээд идэвхтэй хамтран ажиллаж байгаа шүү. Бүлгийн ахлагч Л.Эрдэнэчимэг маань өөрөө их дайчин эмэгтэй. Сэтгэл, үзэл бодол нэгдэж байгаа болохоор бидний хамтын ажиллагаанд ямар нэг саад бэрхшээл, хүндрэл одоогоор гараагүй байна.

-ИЗНН УИХ-д нэр дэвших эрхийг 600 саяар зарсан гэх мэдээллүүд сонин хэвлэлээр бичигдэж байна. Энэ үнэн юм уу?

-Огт худлаа.

-Ерөнхийлөгчийн сонгуульд танай намаас яаж оролцох вэ?

-Одоогоор энэ талаар бид ярилцаагүй байна. Орон нутгийн сонгуулийн ажилд гол анхаарлаа хандуулаад ажиллаж байна.

-Дауны хам шинжтэй хүүхдүүдийн эцэг эхийн холбооны ажилдаа сүүлийн үед хэр оролцож байна вэ?

-Боломжтой цагтаа оролцож байгаа. Саяхан гэхэд Тайванийн хүүхдийн эмч нарыг урьж, дауны хам шинжтэй хүүхдүүдэд үзлэг зөвлөгөө өгсөн.

-Улс төрд байхдаа хүрэхийг хүссэн оргил тань?

-Нэг их оргилд нь гарчих юмсан гэсэн хүсэл гээд байх юу байх вэ. Гол нь улс орны хөгжил, иргэдийн амьдралыг дээшлүүлэхэд өөрийн гэсэн хувь нэмэр оруулж, хойч үедээ тустай үйл бүтээхийн төлөө л өөрт байгаа боломж бололцоогоо дайчлаад явж байна.