Дэлхийн соёлын жирийн бус үзэгдэл “Ганнам стиль” хүчээ авсаар л. Барууны цэргүүдээс, Флиппиний хоригдлууд, Төв Азийн монголчуудаас Америкийн хөгшчүүл гээд энэ дууг, энэ стилийг дуурайн тунхаглаагүй улс орон үлдсэнгүй гэхэд хилсдэхгүй биз.

  12 жил шаргуу хөдөлмөрлөсөн 34 настай Өмнөд Солонгосын рэпперийг ийм амжилтад хүрнэ гэж хэн санах билээ. Тэр өөрөө ч санаагүй байсан юм. Соёлын шинэ урсгалыг эхлүүлсэн PSY-ийн өнгөрсөн долоо хоногт “New York Times” сонинд өгсөн ярилцлагыг хүргэе.


-Та Ганнам стиль дуугаа дэлхийн хит дуу болох нь гэдгийг хэзээ мэдсэн бэ?

-Би долдугаар сарын 15-нд дуугаа олон нийтэд цацсан. Гэвч эхний арван өдөртөө онц гойд зүйл ажиглагдаагүй. Харин 11 дэх өдрөөс миний дууны дор гадны янз бүрийн хэлээр бичсэн сэтгэгдлүүдийг олж харсан. Бас олон алдартнууд миний клипний талаар твиттертээ бичиж, нийтэлсэн байсан. Яг энэ үеээс л би “Ганнам стиль” маань дэлхийд таалагдаж байгааг ойлгосон.

-Ганнам стилийн бүжгийг хурим дээр ч элбэг бүжиглэх болсон байна лээ. Сүүлийн үед энэ бүжиггүй хурим гэж үгүй болсон байна.
-/Инээв/. Би энэ бүжгийг хуриманд тохирно гэж бодохгүй л байна. Энэ бол албан ёсны биш, харин чамин ганган бүжиг. Гэхдээ ийм мэдээ сонсох сайхан байна.

-Энэ бүжгийн хөдөлгөөнийг яаж олсон бэ?
-Шинэ зүйл сэдэхийн тулд маш шаргуу хөдөлмөрлөсөн. Морины бүжгийг олоход яг нэг сарын хугацаа зарцуулсан. Сарын хугацаанд манай бүжиг дэглээчид, бүжигчид студидээ өнжиж, миний дараагийн бүжгийн хөдөлгөөн юу байх вэ гэдгийг бодож, туршиж байлаа. Солонгосчууд миний шинэ бүжгийг их хүлээдэг нь бас нэгэн түлхэц болж өгсөн.
 
-Та америк хөгжим их сонсдог уу?
-Солонгосын дуучин, хөгжимчин бүр танай попоос суралцаж байдаг юм. Би Солонгосын уран бүтээлчдийг дэлхийн хамгийн шилдэг нь гэж хэлэхгүй, гэхдээ хамгийн хөдөлмөрч уран бүтээлчид гэж мэднэ. Үүнийг өөрөө ч харуулахыг хичээнэ. Би Лас Вегаст iHeartRadio-ийн фестивальд оролцоод явж байтал нэг хүн намайг зогсоогоод “Чи PSY уу?” гэж асуугаад өөрийгөө Жон Бон Жови гэдгийг хэлсэн. Би Бон Жовигийн “You Give Love a Bad Name” дуу гарснаас хойш түүнийг сонсч өссөн. Тиймээс энэ үнэхээр сайхан мөч байсан. Би хамтдаа зургаа авахуулж, тэр фэйсбүүктээ хийсэн байсан. Итгэмээргүй санагдсан шүү.

-Та Бостоны их сургууль болон Беркли коллежид хөгжмийн чиглэлээр сурч байсан. Төгссөн үү?
-Үгүй ээ, би төгсөөгүй. Би дөрвөн жил нэгдүгээр курсын оюутан явсан. Хөгжмийн ангид сурах үнэхээр хэцүү байсан.

-Хөгжмийн сургууль таны уран бүтээлд нөлөөлсөн үү?
-Би тэнд сурч байх үедээ дуучин биш хөгжмийн зохиолч болохыг хичээж байлаа. Би бусдын бүтээлийг дуурайж болохгүй, зөвхөн өөрөө л хийх ёстой байсан. Шударгаар хэлэхэд одоо би суралцаж төгсөөгүйдээ их харамсдаг. Хэрвээ би дууны хөгжим зохиох болвол эгшиг хэрхэн зохицох, эсвэл ямар нэгэн хөгжмийн ойлголтын талаар мэдэхгүй. Хөгжмийн зохиолч гэдэг маш хэцүү ажил.

-Та ямар төрлийн хөгжим сонсч өссөн бэ?
-Миний хөгжмийн амьдарлын баатар бас загвар бол Queen хамтлагийн Фредди Меркури байлаа. Түүний дуу бичих чадварыг би хэзээ ч гүйцэж чадахгүй, харин хүмүүсийг хэрхэн хөгжөөхийг би түүнээс л сурсан юм. Миний дуу одоо UK чартад нэгдүгээрт бичигдэж байна. Хэрвээ надад тийшээ явах боломж гарвал би Queen хамтлагынхантай уулзаад тэдний хөгжмийг сонсоод хэрхэн хөглөгддөг байснаа заавал хэлнэ. Queen, Бон Жови, Айросмит, Guns N’ Roses... би олон рок хамтлаг сонсдог байсан. Би бас бөмбөр нүдчихнэ ээ хааяа.

-Та сонсч өссөн мэдрэмжээ яаж өөрийн дуундаа шингээсэн юм?
-1999-2000 оны үед америкт байхдаа дуу бичих гэж оролдсон нь дандаа хип хоп дуунууд байв. Би тэр үед Tupac, Notorious B.I.G., Dr. Dre, Eminem, Snoop Dogg-ийн дууг сонсдог байсан. Гэвч миний дотоод мэдрэмж хольж хийхийг шаардаж байсан. Би дуураймаар бүжиг бүжиглэх бас бүжиглэмээр дуу хийх ёстойгоо ойлгосон.

-Та дуулж, бүжиглээгүй үедээ юу хийдэг вэ?
-Би уудаг. Энэ бол миний эн тэргүүний хобби.

Ганнам стиль дуу хамгийн богино хугацаанд хамгийн олон нээгдсэнээрээ Гиннессийн номонд бичигдэж, PSY-ийн нэр хүнд өссөнөөр эцгийнх нь компаний хувьцаа өсч, Жастин Биберийн менежер Скүүтер Браунтай уулзаж, магадгүй Ганнам стилийн англи хувилбарыг гаргана хэмээх хүлээлт үүсгээд буй. Хөгжмийн соёлын шинэ урсгал, дэлхийн хит ганнам стиль хаана хүртэл явах бол?