Улсын нэгдүгээр төв эмнэлэг Эрхтэн шилжүүлэн суулгах тасагтай боллоо. Таван ортой уг тасагт эрхтэн шилжүүлэн суулгуулсан хүмүүсийг хэвтүүлж, хагалгааны дараах эрчимт эмчилгээг хийх гэнэ. Энэ тасгийг нээхээс өмнө эрхтэн шилжүүлэн суулгуулсан хүмүүсийг Сэхээний тасагт хэвтүүлдэг байж. Янз бүрийн өвчтэй хүмүүс тэнд нь хэвтдэг учир өвчтөн халдвар авах эрсдэлтэй байжээ.

Харин тусгай үйлчилгээтэй шинэ тасаг ариун цэврийг дээд зэргээр хангасан бөгөөд тэнд мэргэшсэн эмч, сувилагч нар ажиллаж байгаа гэнэ. Улсын нэгдүгээр төв эмнэлгийн эмч, мэргэжилтнүүд бөөр, элэг, үе шилжүүлэн суулгах хагалгаа нэвтрүүлсэн. Удахгүй ясны чөмөг шилжүүлэн суулгах мэс засал нэвтрүүлэхээр эмч, мэргэжилтнүүдээ сургаж, шаардлагатай тоног төхөөрөмжүүдээ бэлтгэж байна.

Бөөр шилжүүлэн суулгах мэс заслын үед хэрэглэдэг тариа тасарснаас энэ хагалгааг өнгөрсөн зунаас хойш хийгээгүй юм. Харин энэ долоо хоногт эм нь ирэх бөгөөд ойрын хугацаанд таван хүнд уг хагалгааг хийхээр бэлтгэж байгаа гэнэ.