Хууль зүйн дэд сайд Э.Эрдэнэжамъяаныг өчигдөр АТГ-ынхан өрөөнд нь хууль бусаар байцаах гэж оролдсон гэж УИХ-ын гишүүн О.Баасанхүү мэдэгдсэн. “АТГ-ынхан урьдчилан мэдэгдэлгүйгээр буюу хууль бусаар, ямар үндэслэл нь мэдэгдэхгүй гэрчийн мэдүүлэг өгөхийг шаардсан” гэж сүр дуулиантайгаар мэдэгдээд байгаа. Тэгвэл АТГ-ынхан үүнд огт өөр хариулт өгч байна. Дэд сайд Э.Эрдэнэжамъяаныг байцаахдаа эрх, үүргийг нь танилцуулж, гарын үсэг зуруулаад мэдүүлэг авч эхэлж байхад нь О.Баасанхүү гишүүн орж ирж бөөн шуугиан дэгдээсэн аж. Хамгийн сонирхолтой нь Э.Эрдэнэжамъяанаас МАХН-ын дарга, ерөнхийлөгч асан Н.Энхбаярын хэрэгтэй холбоотойгоор мэдүүлэг авах гэж байжээ. Учир нь Э.Эрдэнэжамъяаны нэрээр интерполоор эрэн сурвалжилагдаж буй Н.Энхбаярын төрсөн дүү Н.Энхтуяа, “Өргөө” зочид буудлын хувьчлалтай холбоотой Б.Хуяг нарыг интерполоор эрэн сурвалжлахаа зогсоож өгөөч гэсэн утгатай албан бичиг явуулсан байна. Уг нь ийм хүсэлтийг дэд сайд гаргах ёсгүй тул Интерполын нарийн бичгийн даргын газраас энэ хэргийг лавлахаар Хууль зүйн яамд захидал илгээсэн нь түүнийг “барьж” өгсөн бололтой. Н.Энхбаярын хэргийг АТГ шалгаж, шүүхэд шилжсэн байгаа. Өөрөөр хэлбэл Э.Эрдэнэжамъяан дэд сайд Н.Энхбаярын хэрэгт холбоотой хүмүүсийг мөрдөн шалгахад саад учруулсан хэрэгт унажээ. Тиймээс түүнд эрүүгийн хэрэг үүсгэж ч болзошгүй байгааг эх сурвалжууд мэдээлж байна. Уг бичгийг Монгол Улсын Интеополын Үндэсний Товчооноос Э.Эрдэнэжамъяаны нэрэр очсоныг бодвол хэн нэгэн хүн түүний нэрийг барих боломжгүй мэт. Н.Энхбаярыг улс төрийн хэлмэгдүүлэлтэнд өртлөө гэж байнга ярьдаг залуу дэд сайдыг ийм бичиг явуулсан гэхэд гайхах хүн ч цөөн байна.

  Харин УИХ-ын гишүүн О.Баасанхүүгийн хувьд юмны учир, хужрыг тунгаагаагүй байж жаахан түргэдэв бололтой. Би УИХ-ын гишүүн гээд юм болгонд түрүүлж дуугарах нь тийм ч сайн зүйл биш. Түрүүлж дуугарсан хөхөөний ам хөлддөг гэдэг. Ямартаа ч шинэ Засгийн газрын бялуу хуваалтаар дэд сайдын суудалд очсон Э.Эрдэнэжамъяан албан тушаалаа урвуулан ашигласан, хэргийн мөрдөлтөнд саад учруулсан гэх зэргээр буруутгагдаж эхэллээ.