Өмнөговь аймгийн Овоот толгойн ордыг эзэмшдэг "Саутгоби Ресурс” компанийн ахлах хуулийн зөвлөх Сара Армстронгийг мөнгө угаасан, авлига авсан хэргээр АТГ-аас шалгаж байгаа билээ. Тэгвэл өнгөрсөн баасан гарагт түүнээс АТГ-ынхан мэдүүлэг авсан байна. Түүнээс "Саутгоби Ресурс” компанийн таван ширхэг ашигт малтмалын лицензийг хэрхэн олж авсан талаар асуусан гэж theaustralian.com /Австралийн эдийн засаг, уул уурхайн томоохон сайт/-д бичжээ. Сара Армстронг ч компанийн лицензийг хэрхэн худалдан авч, төлбөрийг нь төлсөн талаар мөн байгууллагийнхаа санхүүгийн үйл ажиллагаа хэрхэн явагддаг тухай мэдүүлсэн байна. Үүний зэрэгцээ Ашигт малтмалын газрын дарга байсан Ц.Батхуягийн авлигын хэрэгт холбоотой асуудлыг ч хөндсөн гэжээ.

   Сара Армстронг хуульч хүний хувьд энэ хэрэгт өөрийгөө гэм буруугүй гэдгээ нотлох баримт хэлсэн ч үүнийг нь Монголын албаныхан чухалд үл тооцон, хэрэгсэхгүй байгааг тэрбээр онцолсон байна. “Асуудлын гол цөм авлигын хэрэгт л төвлөрч байна” гэж нэгэн эх сурвалж theaustralian.com-д ярьжээ. Энэ хэрэгт Австралийн Засгийн газар онцгой анхаарч байгаа юм. Гэсэн ч Монголын тал тэднээс туслалцаа авахыг зөвшөөрөөгүй аж. Монгол дахь Австралийн ерөнхий консул Дэвид Лаусонд ч байцаалт авч байгаа өрөөний гадна хаалга манаж суусан байна. Австралийн Гадаад хэргийн яамны төлөөлөгч мэдэгдэхдээ “Бид ямартаа ч байцаалт дуусахыг хүлээх болно” гэжээ. Австрали эмэгтэйгээс АТГ-ынхан хоёр дахь удаагаа байцаалт авсан нь энэ юм.

   Сара Армстронг одоогоор Монгол улсын нутаг дэвсгэрээс гарах эрхгүй болоод байгаа бөгөөд түүний ээж Ивонне охинтойгоо 24 цагийн турш холбоо бариагүйдээ ихэд санаа зовж байгаа аж. Сара Армстронг нь 32 настай, Монголд ирэхээсээ өмнө Хонконгд мөн хуулийн зөвлөхөөр ажиллаж байжээ.