Монгол улстай хил залгаа Хиагт орчмоор чононд бариулсан малын тоо ихэссэн учир Буриадын эрх баригчид тус нутагт их ав зохион байгуулахаар болов. Орон нутгийн удирдлагын тооцоолсноор энэ жил Хиагт орчимд 18 тугал, 13 хонь, 20 адуу монгол чонын хоол болжээ. Нийт хохирол 1 сая рубльд дөхсөн байна. Нутгийн анчид өөрсдийн хүчээр саарал чонотой тэмцэж дийлэхгүй байгаа юм.

  Буриадын фермерүүдийн нийгэмлэгийн тэргүүн Баир Бальжировын санаачилгаар хотын анчдыг энэ авд татан оролцуулах болжээ Зэр зэвсэг, техник хэрэгсэл хангалттай ч туршлага мэдлэг дутмаг хотын анчид нутгийн газарчин-анчдад мөнгө төлөн, удирдлаган доор нь чоно авлах дуртай байна. Энэ санаачилгыг нутгийн удирдлага ч уухайн тас хүлээн авчээ.

  Буриадын байгаль орчны хяналтын газрын мэргэжилтэн Дамба Цыреновын Буриадын радиод өгсөн ярилцлагад дурдсанаар бол хотын анчдын десант ойрын өдрүүдэд Монголын хил орчимд буух юм.
-Энэ санал санаачилга малчин, тариачин өрхүүдийн эрх ашгийг хамгаална. Шуурхай, чадварлаг, сайтар зэвсэглэсэн улс оролцох хүсэлтэй байна. Чонын ав бас идэвхтэй амралтын нэг хэлбэр ч мөн. Ойрын өдрүүдэд тэд Хиагт руу хөдөлнө гэж тэр ярьжээ.
    Хилийн дэглэм зөрчихгүйн тулд заставтай ярьж тохирсон байгаа гэж түшмэл мөн мэдэгджээ.