Монгол Улсын эдийн засгийн өсөлтийн 90 хувь нь уул уурхайн салбараас шууд хамааралтай байна. Энэ нь нэг талаараа бусад салбар эдийн засгийн өсөлтөд нөлөөлж чадахгүй буй талаар Дэлхийн банк онцоллоо. Өнөөдөр тус банк Монгол Улсын улирлын эдийн засгийн тоймыг танилцуулсан юм. Энэ оны нэгдүгээр улиралд 16.5 хувьтай байсан ДНБ-ий өсөлт хоёрдугаар улиралд саарч 11 хувь болсон хэдий ч ямар нэгэн ноцтой сөрөг цочрол үүсэхгүй тохиолдолд он дуустал 10 хувиас буурахгүй байх төлөвтэй байна. Экспорт энэ оны наймдугаар сард өмнөх оны мөн үетэй харьцуулахад 39 хувиар буурсан нь 2009 оноос хойшхи хамгийн их бууралт болсон гэнэ. Үүний шалтгаан нь БНХАУ руу гаргасан экспортын бууралт бөгөөд тэр дундаа нүүрсний салбараас нөлөөлсөн байна. Экспортын бууралт импортынхоос түрүүлж буй учраас урсгал дансны алдагдал цаашид улам нэмэгдэх магадлалтай гэнэ. Хэдий үзүүлэлт буурсан ч хямралын төвшинд очих хэмжээнд хүрээгүй гэдгийг Дэлхийн банк онцолсон юм. Европын хямрал, Америкийн эдийн засгийн бууралтыг бодоход манай орны эдийн засгийн төлөв байдал тийм ч таагүй биш байгаа аж. Хэдий тийм боловч уул уурхайгаас шууд хамааралтай болсон манай орны хувьд дан ганц уул уурхай гэхээс илүүтэй хөдөө аж ахуй болон бусад салбарыг хөгжүүлж эдийн засгийн өсөлтөд хамааралтай хэмжээнд хүргэх нь чухал юм.

Монголбанкнаас төгрөгийн ханшийн уналтыг хязгаарлах зорилгоор гадаадын вальютын зах дээр хааяа нэг интервенци хийснээс гадаад вальютын нөөц буурч 1.4 тэрбум ам.доллар болсон нь сүүлийн хоёр жилийн хамгийн доод үзүүлэлт болжээ.   

Мөн Дэлхийн банкны тайланд төсвийн тодотголыг тийм ч зөв зүйтэй болоогүй гэж үзэж буй бөгөөд төсвийн зарлага нь их байгаа гэнэ. Гол нь төсвийг дэд бүтэцрүү чиглүүлж, томоохон бүтээн байгуулалт зарцуулах нь хэрэгтэй гэдгийг онцолсон юм.