Хэдхэн хоногийн өмнө МАН-ын гишүүдийг жагсаал цуглаан хийснийх нь төлөө торгоно гэж сануулах, сүрдүүлэх аясаар мэдэгдэл хийж явсан УИХ-ын тамгын газрын дарга Ц.Шаравдорж төрийн ажлаа өгөөд удаагүй байна. 

Харин тэрээр төрийн ажлаа өгөөд завтай болсон төдийгүй амрах янзгүй ажиллаж байгаа гэж эх сурвалж мэдээллээ. Урт удаан хугацааны амралт авсан тэрээр улс төрийн ажилд ханцуй шамлан орж байгаа гэнэ. Угаасаа ийм л зорилгоор төрийн ажлаа өгсөн байж мэдэх юм. Ойр ойрхон МАХН-ын нөлөө бүхий хүмүүстэй уулзалдаж байгаа сурагтай. Харин түүнийг МАН-ынхан гишүүнчлэлээ сэргээнэ гэж хүлээж байгаа ч Ц.Шаравдорж өөр сонголт хийхээр сэтгэл шулуудсан гэх. Тэр МАН-ыг биш МАХН-ыг сонгохоор ярилцаж яваа гэнэ. Түүнд ийм сонголт хийх гурван үндсэн шалтгаан байгаа гэж эх сурвалж тайлбарлав. Нэгд тэрээр цагтаа МАХН-ын дарга Н.Энхбаяртай тун ойрхон удирдлагад нь ажиллаж байсан юм. Тиймээс Н.Энхбаяр даргыгаа ядарч явахад нь дагах нь хүн ёсны асуудал гэж үзэх үндэслэлтэй аж. Хоёрт түүний эхнэр Ц.Эрдэнэчулуун аль хэдийн МАХН-д элсжээ. Тэгээд одоо Өмнөговь аймагт МАХН-ын жагсаалтын хоёрт бичигдэн нэр дэвшиж байгаа. “Гандирс” компанийн захирал гэдгээрээ олны танил болсон энэ эрхэмийг Н.Энхбаярын намын гол хандивлагчдын нэг гэдэг. Гуравт Ц.Шаравдоржийн эхнэр Ц.Эрдэнэчулууныг МАХН-ын нарийн бичгийн дарга, Эдийн засгийн хөгжлийн яамны дэд сайд О.Чулуунбаттай хамаатан гэдэг яриа бий. Энэ мэт гурван үндэслэлээр Ц.Шаравдорж МАХН-ыг сонгох нь тодорхой болсон гэнэ.  

Цагтаа МАН-ын гайгүй сайн хуульчдын тоонд багтаж парламентын чанга дуу хоолойтнуудын нэг явсан Ц.Шаравдоржид цаашид хоёр зам үлдсэн байж мэдэх юм. Нэг бол Н.Энхбаярын намаас улс төрийн карьераа дахин өөрөөр эхлэх. Эсвэл Н.Энхбаярын намд элсэж бизнесийн ажлаасаа улс төрийг илүүд үзэх болсон эхнэр Ц.Эрдэнэчулууныхаа “уяач”-аар ажиллах. Хэрэв тэр хоёр дахь замыг сонгох юм бол бизнесмен болж “Гандирс” хэмээх барилгын компанийг удирдаж мэдэх юм.

Ийнхүү УИХ-ын тамгын газрын гайгүй даргагэж үнэлэгдэж явсан Ц.Шаравдорж унаган намдаа эргэж очихгүй нь. Уг нь түүнийг одоогийн МАН-ынхан дэмжиж УИХ-ын тамгын газрын дарга болгосон юм. Харин тэрээр тамгын газрын даргын ажлаасаа буухдаа МАХН-д элсэх шийдвэр гаргах нь бараг тодорхой болжээ. Ингэснээр МАН-аас нүүр буруулж МАХН-ыг бараадагсадын тоо нэг ланжгар гэгдэх хуульчаар нэмэгдэх бололтой.