Монголын загварын ертөнцийн хамгийн том арга хэмжээ болох “Гоёл” наадмыг тойрсон сайн муу мэдээ тасардаггүй. 21 жилийн түүхтэй тус наадам 2001 оноос эхлэн загвар өмсөгчдөд “Топ модель” өргөмжлөлийг гардуулдаг болсон. Энэ наадмаас “топ” өргөмжлөлийг хүртсэн хэнбугайн ч нэр хүнд суга өсдөг жамтай. Мөн наадмын эргэн тойронд яригддаг бас нэгэн зүйл бол  “Монгол газар”- ын Ц.Мянганбаяртай холбогдсон хүүхнүүд гоёлд түрүүлдэг гэсэн яриа. Гэвч энэ яриаг загварынхан хэзээ ч хүлээн зөвшөөрч байгаагүй юм. Гэтэл анх удаа энэ мэдээллийг үндэслэлтэй гэдгийг топ модель Э.Одгэрэл шууд зарласан нь олны үг ортой гэдгийг баталлаа. Э.Одгэрэл “Болормаа бид хоёр ярилцаж байгаад “Гоёл” наадамд дахин оролцохгүй гэсэн шийдвэр  гаргасан.  Уг наадмын утга учир алдагдаад удаж байна. Одоо цагт Ц.Мянганбаяртай  нэр холбогдсон хүмүүс л топ модель болдог болсон байна шүү дээ” гэж ярьжээ. Э.Одгэрэлийн хувьд “Гоёл” наадмыг анх зохион байгуулагдаж байсан үе буюу 1988 оноос эхлээд 2008 он хүртэл тасралтгүй орсон. Энэ наадмын хамгийн анхны топ. Түүний хэлсэн “сүүлийн үед” гэсэн  үг нь загвар өмсөгч, топ модель Д.Пүрэвсүрэн буюу түүнээс хойшхи топуудыг онилоод байгаа юм шиг. Д.Пүрэвсүрэнгийн хувьд Ц.Мянганбаярын экс эхнэр. Тэрбээр 2006 онд “топ модель” өргөмжлөл хүртэж байв. Хүмүүс түүнийг хамгийн алдартай топ модель ч гэдэг. Д.Пүрэвсүрэнгээс хойш Г. Уранцэцэг Г.Алимаа, О.Уянга, Ч.Уранбилэг, Э.Сэлэнгэ гэсэн топ төржээ.

Ц.Мянганбаярыг олон сая төгрөгөөр охид зугаацуулдаг цаашлаад ар гэрт нь хүртэл тусалдаг гэсэн яриа байдаг. Сэтгүүлч Ц.Мянганбаяраас  олон бүсгүйтэй нэр холбогддог талаар нь асуухад “Би улс орон болоод хувь хүнийг хэзээ ч хохироож байгаагүй” гэж хариулж байсан удаатай. Хамгийн сүүлд татварын газрын мэдээлснээр Ц.Мянганбаярын “Монгол газар” компани улсад 2264682.6 өртэй гарчээ. Түүнийг олон саяар загварын охид зугаацуулж явахаар улсад төлөх ёстой өрөө төлөх хэрэгтэй гэж шүүмжлэх нэгэн ч байна.

Загварынхан дотроо ялзарч байгааг хуучны топ, загварын акул гэгддэг Э.Одгэрэл анх удаа ил болголоо. Тиймээс ч нэг хэсэг энэ шуугиан тасрахгүй биз. Энэ яриаг дагаад загварынхан Ц.Мянганбаяраас хол байх ёстой гэсэн шүүмжлэл, маргаан ч их өрнөж эхэллээ. Цаашдаа энэ салбарыхан энэ талаар дорвитой арга хэмжээ авах бололтой.