Улсын Дээд шүүхийн Судалгааны төвөөс сүүлийн зургаан жилийн байдлаар шүүхээр шийдвэрлэгдсэн гэр бүлийн маргааны талаар судалгаа гаргажээ. Шүүхээр шийдвэрлэгдэж байгаа гэр бүлийн маргаан 2007-2010 онд байнга өссөн бол 2011 оноос хойш буурсан үзүүлэлттэй байна.
Шүүхүүд Гэр бүлийн тухай хуулиар энэ оны эхний хагас жилд 1833 хэрэг, нийт 22441 хэрэг шийдвэрлэжээ. Сүүлийн зургаан жилийн байдлаар анхан шатны шүүхээр хянан шийдвэрлэсэн иргэний нийт хэргийн 12.7 хувь нь гэр бүлийн эрх зүйн маргаан байна.
Гэр бүлийн маргааны 78.2 хувь нь буюу 17562 нь гэрлэлт цуцалсан хэрэг байна.
Түүнчлэн 2012 оны эхний хагас жилийн байдлаар гэрлэлт цуцалсан хэрэг өмнөх оны мөн үетэй харьцуулахад 447 хэргээр буюу 23.1 хувиар буурсан байна.
Гэрлэлт цуцлалтаас үүдэлтэйгээр хүүхдийн эрх ашиг хөндөгдөж байгаа нь ихээхэн сэтгэл эмзэглүүлсэн асуудал юм. Шүүхээс тэтгэлэг тогтоолгосон хүүхдийн тоо сүүлийн зургаан жилд 8313 байна. Түүнчлэн хүүхдийн тэтгэлэг албадан гаргуулсан тохиолдол 2183 байгаа нь үүний нэг илрэл билээ.
Мөн хуулийн дагуу эцэг эх байх эрхийг нь хассан тохиолдол сүүлийн 6 жилд 47 удаа гарсан ажээ. Түүнчлэн шүүхээс хуулийн дагуу эцэг тогтоосон тохиолдол сүүлийн 6 жилийн байдлаар 1942 байгаа аж.