2023 оны 8-р сарын 13-ны өдөр БШУЯ-ны Шинжлэх ухаан, технологийн бодлого, инновацийн хөгжүүлэлт, хэрэгжилтийг зохицуулах газрын дарга, доктор Д.Баттогтох, Монгол Судлалын Үндэсний Зөвлөлийн нарийн бичгийн дарга, доктор, дэд профессор Ц.Цэрэндорж нар “Олон Улсын Залуу Монгол Судлаачдын Зуны Сургууль”-ийн оролцогчдод зуны сургуулийг амжилттай дүүргэсэнд нь баяр хүргэж, гэрчилгээ гардууллаа.
Тус “Олон Улсын Залуу Монгол Судлаачдын Зуны Сургууль”-ийг Монгол Улсын Боловсрол, Шинжлэх Ухааны Яам, Монгол Судлалын Үндэсний Зөвлөл, Залуу монголч судлаачдын “Эрдмийн хэлхээ” нийгэмлэг хамтран 2023 оны 7-р сарын 31-нээс 8-р сарын 13-ны өдрийн хооронд зохион байгуулсан бөгөөд ОХУ, БНХАУ, Япон, Солонгос, Турк, ХБНГУ зэрэг 7 орны 30 гаруй залуу судлаач оролцож, Шинжлэх Ухааны Академи, СУИС, МУИС-ийн эрдэмтэн, багш нар түүх, угсаатан судлал, хэл, уран зохиол, соёл урлагийн чиглэлээр хичээл заасан юм.
Мөн зуны сургуулийн хөтөлбөрийн хүрээнд оролцогчид монгол орны түүхийн дурсгалт газрууд, “Даншиг наадам-хүрээ цам 2023”, Чингис хаан Үндэсний музей, Богд хааны ордон музей, Чойжин ламын сүм музей, Монголын Үндэсний музей, Төв номын сан, МБШТөв-Гандантэгчэнлин хийдтэй танилцаж, “Олон Улсын Монголч Эрдэмтдийн XII хурал”-ын Залуу судлаачдын салбар хуралдаанд илтгэл хэлэлцүүлэн өөрсдийн судалгаа, шинжилгээний талаар танилцуулжээ.
