“Монгол-Хятадын Экспо” нь 2023 оны есдүгээр сарын 6-10-ны өдрүүдэд БНХАУ-ын ӨМӨЗО-ы Хөх хотод зохион байгуулагдаж буй. Дөрөв дэх жилдээ болж буй тус үйл ажиллагаа нь "Хөгжлийн шинэ боломжуудыг нээн хуваалцаж шинэ хэв маяг бий болгох нь" уриан дор амжилттай эхэллээ. Нээлтийн үеэр Монгол Улсын Шадар сайд С.Амарсайхан тус экспогийн ач холбогдол, онцлогийн талаар дурдлаа.
Тэрбээр, "Умар зүг болон бусад бүс нутгийн төлөөлөл оролцон бүс нутгийн хамтын ажиллагааг өргөжүүлэх боломжийг эрэлхийлж буйд сэтгэл нэн ханамжтай байна.
Монгол–Хятадын эдийн засгийн харилцаа, хамтын ажиллагааны хүрээг өргөтгөн хөгжүүлэх зорилгоор Монгол-Хятадын худалдаа, эдийн засгийн хамтын ажиллагааг хөгжүүлэх дунд хугацааны хөтөлбөрийг бид шинэчлэн байгуулж, худалдааны эргэлтийг 2030 онд 20 тэрбум ам.долларт хүргэх зорилт тавьсан бол өнөөдрийн байдлаар бид 13 тэрбум давах боломж бүрдүүлсэн байна.
Энэ хэрээрээ бид богино хугацаанд зорьсон зорилтдоо хүрэх, хамтарч, харилцан үр ашигтай ажиллах боломж нөхцөл ойрын хугацаанд бүрдэж 20 тэрбумаар тогтохгүй хэмжээний гадаад худалдаа, эдийн засгийн хамтын ажиллагааг гүнзгийрүүлэн өргөжүүлэх нөхцөл ч бүрдлээ гэж үзэж байна.
Монгол-Хятадын эдийн засгийн харилцаа, хамтын ажиллагааны хүрээг өргөтгөн хөгжүүлэхэд ӨМӨЗО-той хийж буй хамтын ажиллагаа онцгой үүрэг гүйцэтгэж байна. Айл хүмүүсийн амь нэг, саахалт айлын санаа нэг гэдэг. Юу байна түүгээрээ дайл ч гэдэг. Үзэсгэлэн худалдаанд манай улсаас 500 гаруй ААН, түүний төлөөлөл оролцон бараа бүтээгдэхүүнээ сурталчлан таниулж, борлуулахаар байршуулсан бөгөөд төр засгийн албаны хүмүүс бизнес эрхлэгчид, эрдэмтэн судлаачид соёл урлаг, спортын зүтгэлтнүүд зэрэг олон зуун хүн ирж оролцон тус тусын шугамаар ӨМӨЗО-ны холбогдох байгууллага, БНХАУ-ын ААН-үүдтэй уулзалт хийж арга хэмжээ зохион байгуулж, хоёр талын хамтын ажиллагаа, хүмүүс хоорондын харилцааг гүнзгийрүүлэхэд томоохон түлхэц өгнө гэдэгт итгэж байна.
Энэхүү арга хэмжээ манай хоёр улсын хамтын ажиллагааг ХАА, уул уурхай, эрчим хүч, боловсрол, байгаль орчин, банк санхүү, хөрөнгө оруулалтын салбарт өргөжүүлэн хөгжүүлж, харилцан ашигтай томоохон төсөл хөтөлбөр эхлүүлэх талбарыг нээж буйгаараа онцлогтой юм.
Дэлхий дахинаа олон талт худалдаа, эдийн засгийн тогтолцоонд шинэ сорилтууд тулгарч буй энэ цаг үед Монгол Улсын хувьд хоёр орны улс төрийн харилцааг бататгахын зэрэгцээ эдийн засгийн агуулгыг улам бүр баяжуулах нь чухал гэж үзэж байна. Энэ сорилтын хүрээнд БНХАУ-тай хамтын ажиллагааг гүнзгийрүүлэх, худалдааг өргөтгөх, тарифын бус саад тотгорыг арилгах, уур амьсгалын өөрчлөлтийг бууруулах, дасан зохицох үйл ажиллагааг эрчимжүүлэх тогтвортой хөгжлийн зорилтуудад шаардлагатай хөрөнгө оруулалт татах нь манай улс төдийгүй хоёр улсын хувьд харилцан чухал ач холбогдолтой юм.
Хөгжлийн бодлогоо бүс нутаг болон олон улсын хөгжлийн зорилтуудтай уялдуулан өөрсдийн хувь нэмрийг оруулахад Монгол-Хятадын дөрөв дэх удаагийн энэхүү экспо үнэтэй хувь нэмэр оруулна гэж гүнээ итгэж байна.
Хоёр орны зочид төлөөлөгч та бүхэн аж үйлдвэрлэл, үйлдвэрлэлийн чадавхын ололт амжилт, тэргүүний технологиос харилцан санаа авч туршлага солилцон, шинэ гэрээ хэлэлцээр байгуулж бизнесийн салбараа өргөтгөнө гэдэгт ч бас итгэлтэй байна" гэв.
