“Номхон далайг дамнасан тогтвортой байдлын яриа хэлэлцээ” олон улсын чуулга уулзалт БНСУ-ын Сөүл хотноо эхэллээ. Энэ удаагийн чуулга уулзалт “Эрчим хүчний аюулгүй байдал” сэдвийн дор болж байгаа бөгөөд Монгол Улсын Их Хурлын дарга Г.Занданшатар үндсэн илтгэгчээр хоёр дахь жилдээ оролцож байна.

Чуулга уулзалтын өмнө УИХ-ын дарга Г.Занданшатар, БНСУ-ын Гадаад хэргийн сайд Пак Жин-тэй уулзаж, хоёр улсын Стратегийн түншлэлийн харилцааг улам бэхжүүлэх, эрчим хүчний аюулгүй байдлыг хангахад хамтран ажиллах талаар санал солилцжээ.

Дэлхий нийтийн өмнө тулгарч буй геополитик, эдийн засаг, уур амьсгалын өөрчлөлт зэрэг аливаа хүндрэл бэрхшээлийг улс орнууд хамтын хүчээр даван гарах, байгаль орчныг хамгаалах нэгдсэн бодлого хэрэгжүүлэх цаг ирснийг БНСУ-ын Гадаад хэргийн сайд Пак Жин онцолсон байна. Мөн БНСУ нь хоёр болон олон талт хамтын ажиллагааны цар хүрээг нэмэгдүүлэхийг зорьж байгаа. Дэлхийн эрдэс баялгийн нийлүүлэлтийн сүлжээг тогтворжуулах нь цэвэр эрчим хүчний шилжилтийг хурдасгахад чухал гэдгийг Пак Жин сайд хэлээд Ашигт малтмалын аюулгүй байдлыг хангах олон улсын нийгэмлэгийн (MSP) үйл ажиллагааг дэмжиж ажиллахаа мэдэгдсэн байна.

Үүнээс гадна цэвэр эрчим хүчний эх үүсвэрийг нэмэгдүүлэхэд лити, кобальт зэрэг газрын ховор элементийг ихээр ашиглах шаардлагатай. Иймд олон улсын ашигт малтмалын нийлүүлэлтийн гинжин хэлхээний тогтвортой байдлыг хангахад Монгол зэрэг газрын ховор элемент, критик минералын нөөц ихтэй улс орнуудын шийдвэр гаргагчдын улс төрийн манлайлал, нягт хамтын ажиллагаа чухал болохыг БНСУ-ын Гадаад хэргийн сайд онцлон дурджээ. Өөрөөр хэлбэл, өсөн нэмэгдэж байгаа эрчим хүч, технологийн хэрэгцээг хангахад шаардлагатай нөөцийг ашиглах чиглэлээр БНСУ, Монгол улс хамтран ажиллах боломж өргөн байгааг энэ байр сууринаас тодорхой харж байна. Зөвхөн БНСУ төдийгүй Япон, Европын Холбооны зүгээс энэ чиглэлээр идэвхтэй хамтран ажиллах сонирхол сүүлийн жилүүдэд огцом нэмэгдээд байгаа билээ.