Нийслэлийн хөдөлмөрийн газраас ажилгүйдэл хэр байгааг ажлын байрны бүртгэл зуучлал хариуцсан мэргэжилтэн Н.Амарбаясгалангаас тодруулсан юм.

-Нийслэлийн хөдөлмөрийн газарт одоогоор хэчнээн ажилгүй иргэн бүртгэлтэй байна вэ?

-Нийслэлийн хөдөлмөрийн газар яг өнөөдрийн байдлаар 2192 ажлын байрны захиалга ирсэн байна. Үүнээс  1700 иргэнийг тохирох ажлын байранд зуулчлан ажилд оруулаад байна.
Ажлын байрыг салбараар нь ангилаад үзвэл банк санхүү, хөнгөн үйлдвэрлэл, машин тоног төхөөрөмж гэх мэт ажлын байрнууд бусад салбараа бодвол түлхүү ирсэн.

-Цаашдаа ажилгүй иргэдийг ажилд зуулчлах ямар дорвитой ажил зохион байгуулах гэж байна?

-Хөгжлийн бэрхшээлтэй иргэдэд зориулсан хоёр өдрийн нийт 18 цагийн "Ажилд орох зам" сургалтыг зохион байгуулах гэж байгаа. Энэхүү арга хэмжээний гол зорилго нь хөгжлийн бэрхшээлтэй иргэд тухайн ажил олгогч байгууллага дээр очоод гологдох хандлагатай байдаг. Тэгвэл энэ сургалтанд хамрагдсанаар тухайн иргэн ажил яах хайх, өргөдөх яаж бичих, ажлын байранд зуучлагдаад очоод хүнтэй харилцах чадвартай болгоход чиглэж байгаа юм. Өөрөөр хэлбэл хөгжлийн бэрхшээлтэй иргэдийн хөдөлмөр эрхлэлтийгр дэмжих, тэдэнд ээлтэй хүртээмжтэй үйлчилгээг хөгжүүлэхэд оршино.

-Энэ сургалт хэзээнээс явагдах вэ?

-Энэ оны арваннэгдүгээр сарын 15-16-ны өдрүүдэд Нийслэлийн 5-дугаар сургуульд зохион байгуулагдана. Эхний ээлжинд энэхүү сургалтанд 15 хөгжлийн бэрхшээлтэй иргэд хамрагдахаар болоод байгаа.

- Нийслэлийн хөдөлмөрийн газар хөгжлийн бэрхшээлтэй иргэдэд тусгайлан ямар нэг үйлчилгээг үзүүлдэг  үү?

-Манайд бол хөгжлийн бэрхшээлтэй хэн ч хандаж болно. Ерөнхийдөө Нийслэлийн хөдөлмөрийн газар нь хөгжлийн бэрхшээлтэй иргэдийн хөдөлмөр эрхлэлтийг дэмжих талаарх төрийн бодлого хууль тогтоомжийг хэрэгжүүлэх, бизнес инкубатор төвүүдийн бойжигч болон жижиг дунд бизнес эрхэлж буй хөгжлийн бэрхшээлтэй иргэдийн үйл ажиллагааг дэмжин тэдний бүтээгдэхүүн үйлчилгээг олон нийтэд сурталчлах, зах зээлд гарц олж өгөхөд дэмжин хамтран ажиллаж байна. Хөгжлийн бэрхшээлтэй иргэдэд мэдээлэл түгээх, бүлгээр болон ганцаарчилсан зөвлөгөө өгөх, ажил мэргэжлийн чиг баримжаа олгох үйлчилгээ, хийсэн бүтээлээр нь үзэсгэлэн худалдааг зохион байгуулах зэрэг олон ажлуудыг хийдэг.

-Ганц хөгжлийн бэрхшээлтэй иргэд ч биш, хоригдлуудыг ажлын байраар хангах ажил зохион байгуулдаг гэсэн. Энэ ажил хэр ахицтай байна?

- Нийслэлийн Хөдөлмөрийн газар,    Шүүхийн шийдвэр гүйцэтгэх ерөнхий газартай “Хамтран ажиллах гэрээ”- нд тусгагдсаны дагуу энэ онд ШШГЕГ-ын харъяа  хорих ангиудаас суллагдах хугацаа нь болж байгаа хүмүүжигч нарт “Ажил мэргжлийн чиг баримжаа олгох” сургалтыг зохион байгуулсан байгаа. Тус сургалтаар 2012 онд суллагдах 407, 431, 409, 441, 421-р ангийн  409 хүмүүжигч нарт  суллагдан гараад нийгмийн харилцаанд бие даан хэрхэн оролцох,   ажил мэргэжлийн чиг баримжаа олгох зөвлөгөө өгч ажилласан.

-Хөгжлийн бэрхшээлтэй иргэдийн хийж бүтээсэн буюу урласан зүйлээр үзэсгэлэн гаргадаг. Энэ ажил хэзээ зохион байгуулагдах вэ?

-Нийслэлийн хөдөлмөрийн газар нь жил бүр Хуульзүйн яам, Хөгжлийн бэрхшээлтэй иргэдийн бизнес инкубактор төв болон бусад төрийн болон, төрийн бус байгууллагуудтай хамтран "Хүртээмжтэй орчин" аяныг зохион байгуулдаг.  Нийслэлийн хэмжээнд ирэх сард зохион байгуулагдана.

-Төсөл хөтөлбөрүүд хэрэгжиж байгаа юу?

- Тийм. Нийслэлийн хөдөлмөрийн газарт хөтөлбөр хэрэгжиж байгаа. Үүнд ажилгүй иргэдийг бүлгийн зохион байгуулалттайгаар газар тариалан эрхлүүлэх хөтөлбөр, мэргэжлийн болон давтан сургалт явуулж байгаа. Мөн Нийслэлийн хөдөлмөрийн газрын дэргэдэх зөвлөгөө мэдээллийн төв нь оюутан залуучуудын хөдөлмөр эрхлэлтийг дэмжих дэд хөтөлбөрүүдийг хэрэгжүүлэн ажиллаж байна.

-Танай байгууллагад иргэд бүртгүүлэхдээ ямар бичиг баримт бүрдүүлэх ёстой вэ?

- Нийслэлийн хөдөлмөрийн газарт бүртгүүлэхдээ иргэний үнэмлэх, нэг хувь цээж зурагтай ирээд мэргэжилтнүүдээс анкет авч бөглөөд сонирхосон ажлын байрандаа зуучлуулж болно.