Монгол Улсын Ерөнхийлөгч Ухнаагийн Хүрэлсүх АНЭУ-ын Ерөнхийлөгч Эрхэм дээд Шейх Мухаммад бин Заид Аль-Нахъяны урилгаар тус улсад ажлын айлчлал хийж байна. Энэхүү айлчиллын үеэр Гадаад харилцааны сайд Б.Батцэцэг дараах мэдээллийг өглөө.
Тэрбээр "Арабын Нэгдсэн Эмират Улсын ерөнхийлөгчийн урилгаар хүрэлцэн ирээд, хоёр ерөнхийлөгч уулзалт хийлээ. Энд Элчин сайдын яамаа байгуулаад хоёр жил болж байгаа. Энэ хоёр жилийн хугацаанд ямар байдлаар хамтарч ажиллах вэ гэдэг талаар ярилцаж, хамтын ажиллагааны олон баримт бичигт гарын үсэг зурахаар бэлтгэл хангагдаж байсан. Элчин сайдын яамаа Арабын Нэгдсэн Эмират Улс түр хаачихсан байсан. Ерөнхийлөгчийн уулзалтаар элчин сайдын яамаа сэргээн байгуулах шийдвэр гарсан. Ирэх оноос эхлээд шинэ элчин сайд томилогдоод ажиллана. Мөн визийг Бээжин рүү явуулж авдаг нэлээд хүндрэлтэй, өндөр үнэтэй байсан. Харин бүх иргэд харилцан визгүй зорчихоор боллоо. Хамгийн түрүүнд аялал жуулчлал, бизнесийн салбарынханд хөнгөлөлттэй зорчих боломжийг бүрдүүлж байна.
Арванхоёрдугаар сараас эхлээд манай агаарын тээврийн Хүннү компани шууд нислэг хийхээр болж байна. Арабын бизнесменүүд Монголд шууд очих боломжийг бүрдүүлж байна.
Хоёрдугаарт, Эдийн засгийн хамтын ажиллагааны санамж бичигт гарын үсэг зурсан. Энэ нь бид цаашдаа бизнес, эдийн засгийн салбарын хамтын ажиллагааг өргөжүүлэхэд суурь баримт бичиг болно.
Гуравдугаарт, Гадаад харилцааны яам хооронд хамтын ажиллагааны гарын үсэг зурсан. Энэ нь хоёр улсын Гадаад харилцааны яамдын тогтмол ажиллах, хоёр улсын зөвлөлдөх уулзалт зэрэг механизмууд тогтмол ажиллаад ирэхээр ажил төрөл маш хурдтай явна.
Мөн өнөөдөр МҮОНРТ, Арабын Нэгдсэн Эмират Улсын үндэсний телевизтэй гарын үсэг зурж байна. Ийнхүү АНЭУ-тай хамтран ажиллах салбаруудын суурь баримт бичгүүдийг байгууллаа гэж ойлгож болно" гэв.
Д.Батчулуун
