Хорин таван хэл мэддэг гэх Б.Арго өөртөө ардын багш гэх цол олгоод удаж байна. Сургалтын төв, гадаад хэлний сурах бичгээ байнга рекламддаг түүнийг танихгүй хүн ховор. Сүүлд “21 мянга” нэртэй хошин шогийн ном гаргаж хошин урлагийнхныг “ажилгүй болгоно” хэмээн “сүрдүүлж” байв. Гэтэл өдгөө тэрбээр тахилч болж сүсэгтэн олонд Даахий бурхны сахиусыг зарж явна. Түүний эхнэр нь Б.Арготой хувь заяагаар учирсан удган гэнэ. Харин саяхан Спортын төв ордонд Даахий бурханы тахилга хийж, эхнэртэйгээ хамт сүсэгтэн олонд авшиг хүртээсэн бичлэг тарж, түүний бизнесийн ухааныг гайхуулаад авсан юм. Даахий бурханыг мөнгөөр үнэлж, мөнгөгүй бол дараа гайгүй болоод ирээрэй гэх түүнийг олон нийт шүүмжилсэн. "Эхнэр нь хүртэл тэнгэрээс заяасан удган байж таардаг сонин тохиол юм аа" гэж ёжлох хүмүүс ч гарсан. Гэсэн Б.Арго багштан Даахий бурханы тахилга үргэлжлүүлж, шинэ, ашигтай бизнесээ хийсээр явна. Тэрбээр дэлхий сүйрэх сургаар лаа шүдэнзээ зэхдэг монголчуудын дунд аравнайлсан гэх цаасан бурхныхаа үнийг сүүлийн үед өсгөж 10 мянган төгрөгөөр нэмээд байгаа гэнэ.  Зуд болоход нохой зоолж, зовлон ирэхэд лам баяждаг гэдэг шиг зовлон бэрхшээлээ бурханд даатгахыг хүссэн монголчуудын итгэлээр Б.Арго багштан бизнес хийгээд байна. Сахиусын үнийг яагаад өсгөсөн талаар "бензины үнэ өсөөд" гэж тайлбарлахгүй байгаа нь яамай даа.

Бишрэгч: Дараа нь мөнгийг нь авчирч өгч болох уу?
Арго: Мөнгө төгрөгөө авчирч өгч байж ав. Бид нар олны төлөө явдаг хүмүүс тул хар сүлдний тахилгад хэрэглэнэ. Үнэгүй өгчихвөл бурхны өрөнд ордог юм.
Бишрэгч: Энийгээ тэгээд яаж авах вэ, би?
Арго: Яаж авахыг би одоо сайн мэдэхгүй болчихоод байна. Яахав, худалдаад л авчихгүй юу даа.
Бишрэгч: Ямар үнэтэй байдаг юм?
Арго: Энэ чинь 33 500.
Бишрэгч: Дэлгүүрт байгаа юу?
Арго: Дэлгүүрт байхгүй.
Өөр нэг бишрэгч: Бор шувуу нь хамт ирэх үү? Бор шувуугаа дангаар нь авч болох уу?
Арго: Дангаараа 15500 гээд авчихаж байгаа юм. ..

Арго: За тэгээд очоод сайхан сүүтэй, будаатай цайгаа чанаад, сайхан хоол ундаа хийж идээд, Бурхандаа сайхан тахилга өргөөд, тэгээд сайхан, гэр орондоо сайхан хүлээж аваарай, за юу?
Бишрэгчид: Заа.
Арго: Манай энэ Даахий бол одоо тийм амар жанлав нь арилахгүй. Бурхан чинь одоо бүтээгээд нэг ганц хоёр жил болоод ерөнхийдөө жанлав нь арилчихдаг байхгүй юу. Хүч нь муудчихдаг юм.
Нэг бишрэгч: Эмээдээ хоёрыг өгчих.
Арго: Жанрайсиг бол 1996 онд бүтээсэн, 2002 он хүртэл л барьсан. Манайх бол тахил нь ар талдаа байнга байж байдаг, хүчтэй....Дээшээгээ сүлдэнд найдах хэрэггүй, амь амиа бодоцгоо.
Бишрэгч: Тэр ч үнэн шүү.
Арго: Хүнд битгий найд, өөр өөрийгөө л аргал.
Бишрэгч: Энэ Даахий бурханаа аваагүй ч гэсэн Даахий бурхандаа залбираад байж байж болно биз дээ?
Арго: Болно ш дээ, болно. Яваандаа тэгээд гайгүй болохоороо авахгүй юу...