Цөмийн энергийн газрын дарга байсан С.Энхбатыг ерөнхий сайд асан С.Баярын багын найз гэдгийг хүмүүс тэр болгон мэддэггүй. Харин”МАН-ын сайд нар Монголд цөмийн хаягдал булшлах гэрээ хийсэн” гэх мэдэгдлээр нь сайн танина. Түүний энэ мэдэгдэл өнгөрсөн УИХ-ын сонгуулийн үеэр жинхэнэ шуугиан тарьж, том хөдөлгөөн өрнүүлж чадсан. Тэрбээр Засгийн газрын хуралдаанд удаа дараа дуудахад ирээгүй, ажилдаа хариуцлагагүй хандсан гэсэн шалтгаанаар ажлаа өгсөн. Тэгвэл С.Энхбат өнөөдөр юун агентлагийн дарга, түүнээс илүү хувь хүртэж Кувэйт улсад суух элчин сайд болох гэж байна. Тэрбээр УИХ-ын сонгуулийн өмнө Монголд цөмийн хаягдал булшах гэрээ хийх гэж байсан, үүнийг ЭБЭХ-ны сайд асан Д.Зоригт хийсэн гэж мэдэгдсэн нь улс төрийн хүрээний том сенсаци байв. С.Энхбат “Шууд хэлэхэд ЭБЭХ-ний сайд Д.Зоригт энэ хэсгийг ахлаж Япон, Америктай хэлэлцээрүүд хийсэн байдаг. Цөмийн хог хаягдал Монголд булшлах хэлэлцээг гардан хийсэн Д.Зоригт өнөөдөр УИХ-д нэр дэвшээд шударга үнэний дүрд тоглоод явж байна шүү дээ. Баталж болно. Д.Зоригт сайдыг АНУ-д очоод хэлэлцээр хийж байхад нь дэргэд нь элчин сайд Бэхбат сууж л байсан шүү дээ. Элчин сайдын яамны Ариунаа гэж хүүхэн байсан. Одоо энэ Д.Зоригт сайдын зөвлөх хийгээд байгаа н.Ундраа нар байлцсан. Ундраагийн ард хэн байна вэ гэхээр Д.Зоригт сайд байна.  Д.Зоригт сайдын ард Ерөнхий сайд С.Батболд байна. Ерөнхий сайдын ард Монгол Ардын Нам байгаа” хэмээн ярьж байжээ. Харин өнөөдөр түүний энэ нэг талаасаа зоригтой, нөгөө талаас хэрсүү мэдэгдлийн учир зангилаа бага багаар тайлагдаж байх шиг.

    С.Энхбат бол МАН-ын дэмжлэгээр Цөмийн энергийн газрын дарга болж чадсан хүн. Харин ийнхүү намын дарга, Д.Зоригт нарын эсрэг үг дуугарсан нь АН-ын захиалгатай холбоотой юу гэсэн хардлага тарж эхлээд байна. Учир нь УИХ-ын сонгуулиар Чингэлтэй дүүрэгт ЭБЭХ-ний сайд Д.Зоригттой АН-ын гишүүн Г.Баярсайхан өрсөлдсөн. Цөмийн хаягдал булшлах гэж байсан гэх гэрээний талаар яриа Д.Зоригтын рейтингийг навс унагаж, Г.Баярсайхан олон санал авч чадсан гэж болно. Гэтэл  өнөөдөр С.Энхбатыг Кувэйтийн элчин сайд болгохоор Г.Баярсайхан гишүүн хөөцөлдөж, дэмжиж тусалсан гэх яриа саарал ордноор тараад байна. Нэгэнт цагт ах дүү шиг найз нар явсан С.Баярынхаа намаас татгалзаад байгаа түүнийг АН-ын дэмжлэгээр элчин сайд болсныг олон хүн хардаж эхэлжээ. С.Энхбат үнэхээр Г.Баярсайханг УИХ-д гаргах гэж Д.Зоригтыг цөмийн хаягдал булшлах гэрээ хийсэн гэж мэдэгдсэн үү? гэх асуулт хариу нэхэж байна.