МАХН-ын дарга Н.Энхбаяр Улсын дээд шүүхээс 2,6 жилийн ял сонссон ч биеэ эмчлүүлэн Клиникийн хоёрдугаар эмнэлэгт хэвтэж байгаа. Энэ хооронд түүнийг гэр бүлийнхнээс нь гадна намын нөхөд, олон улс төрчид эргэж очжээ. Н.Энхбаярыг сүр дуулиантайгаар хоёрдугаар эмнэлэгт хүргэснээс хойш ээж, аав нь нэг л удаа эргэж очсон байхад шадар сайд Д.Тэрбишдагва, О.Баасанхүү гишүүн хамгийн олон удаа "зочилжээ". Энэ дундаас хамгийн сонирхолтой "зочин" нь МАН-ын дарга Ө.Энхтүвшин. Тэрбээр арваад хоног хөөцөлдөж байна хуучны андтайгаа уулзсан гэдэг.  Ө.Энхтүвшин энэ талаар "Бид хамтдаа маш их зүйлийг туулсан хоёр шүү дээ. Бидний дунд итгэл, үл итгэл, тэгээд дахин итгэл ч байлаа. Хүмүүсийн явуулгаар хоорондын харилцаанд ан цав үүсэж, түр тар гэх үе байсан ч намаа гээд хамтарч ажиллаад явж л байна" гэж байлаа. Харин УИХ-ын гишүүн асан Д.Загджав МАХН-ын даргыг эргэсэн нь бас л сонин. Чухам ямар шалтгаанаар уулзснаа тэрбээр өнөөг хүртэл олонд дэлгээгүй.

   Харин "Шударга ёс" эвслийн "энхрий хайрт" МҮАН-ын гишүүдээс УИХ-ын дэд дарга Л.Цог, эвслийн бүлгийн дарга Н.Батцэрэг нар тус бүр нэг удаа эргэсэн байна. Монгол улсын гурав дахь ерөнхийлөгч Н.Энхбаярыг эргэж очсон хүмүүсийн нэрсийн жагсаалтыг харна уу. Эдгээрээс гадна УИХ-ын гишүүн асан Р.Раш, Мамба дацан хийдийн хамба лам Д.Нацагдорж, МАХН-ын нарийн бичгийн дарга У.Барсболд,  Ч.Чимэдсүрэн, гавьяат эмч Л.Жамбалжав, Хууль зүйн дэд сайд Э.Эрдэнэжамъян, МАН-ын нарийн бичгийн дарга Ц.Сүхбаатар нарын хүмүүс Н.Энхбаяртай очиж уулзсан байна.