УИХ-ын чуулганаар Монгол улсын ерөнхийлөгчийн сонгуулийн тухай хуулийн шинэчилсэн төслийг хэлэлцэж байна. УИХ-ын гишүүн Я.Содбаатар "Ерөнхийлөгчийн сонгуулийн хуулийг МАН-ын гишүүдгүйгээр шийдэх гэж байна. Энэ хуулийг боловсруулахдаа олонхи болсон намаас бусад намуудын эрхийг хэрхэн баталгаажуулж байгаа вэ? Санал авах автоматжуулсан систем одоо хүртэл эргэлзээтэй байна. Энэ тал дээр ямар арга хэмжээ авч байгаа вэ? гэж асуулаа. Хуулийн төслийг санаачлан боловсруулсан УИХ-ын гишүүн Б.Бурмаа уг хуулийн төслийн ажлын хэсэгт МАН, ИЗНН, "Шударга ёс" эвслийн гишүүд багтсан байгаа. Мөн автоматжуулсан системийн хувьд хяналтын тооллого явуулахад ямар нэг саналын зөрүү гараагүй гэв. СЕХ-ны дарга Ч.Содномцэрэн "Сонгуульд автомат машин хэрэглэх эсэхийг УИХ тухай бүр санал хураан шийднэ гэсэн байдаг. Түүнээс СЕХ дур мэдээд саналын машиныг хэрэглээгүй. Хуулиндаа аймаг, дүүргийн сонгуулийн хороонд хоёр хэсэгт хяналтын тооллого хийж байгаа. Намуудын ажиглагч нараас нэг ч гомдол ирээгүй. Сая ганц хоёр хувь хүнээс гомдол ирснийг шалган тайлбарлаж, харуулсан" гэлээ.

   Харин уг ажлын хэсэгт МАН-ыг төлөөлөн оролцсон Д.Лүндээжанцан гишүүн "Бидний хэлсэн олон санал хуулийн төсөлд орсон ч ажлын хэсэгт МАН-ыг төлөөлж байгаагийн хувьд зарим асуудалд санал зөрж байгаа. Автомат машинаар гараар тоолохыг эсэргүүцэж байна. Энэ сонгуульд дөрөв, тавхан хүн нэр дэвших тул гараар хялбархан  тоолж болно. Ерөнхийлөгчийн сонгуулийн суртачилгааны хугацаа 43-47 хоног байсан бол одоо 35 хоног болж байна. Энэ хугацаанд нэр дэвшигчид 21 аймгаар явж амжих уу? Хамгийн гол нь аж ахуйн нэгж, хуулийн этгээд 100 сая, иргэнээс 10 сая төгрөг хүртэлх хандив авч болно гэж оруулж ирж байна. Энэ бол дэндүү их тоо. Мөн УИХ-д хамгийн олон суудалтай намын нэр дэвшигчийг саналын хуудаст эхэнд бичнэ гэсэн. Энэ асуудлуутай санал нийлэхгүй байна" гэв. УИХ-ын гишүүн З.Баянсэлэнгэ саналын хуудаст нэр дэвшигчдийн фото зураг оруулсан нь ямар учиртайг асуухад хууль санаачлагч Р.Бурмаа "Зарим бичиг үсэг тайлагдаагүй хүн нэр дэвшигчдийг хэн бэ гэдгийг мэддэгүй. Бодит байдал дээр ийм хүмүүс хөдөө орон нутагт их байдаг. Тийм хүмүүсийг сонгуульд оролцох боломжийг хангахын тулд зургийг нь оруулж байгаа. Мөн хараагүй иргэн бөглөх боломжтой саналын хуудсын тэмдэглэгээг оруулж ирж байгаа гэлээ.