Өчигдөр АНУ-ын Коннектикут мужийн Ньютаун хотод байдаг "Сэнди Хүк" бага сургуулийн  20 хүүхэд, 6 том хүний амийг буутай этгээд бүрэлгэжээ. Энэ нь АНУ-д энэ долоо хоногт буутай этгээд олон нийтэд халдсан хоёр дахь тохиолдол юм. Хэрэгтэн эхлээд эрхлэгчийн өрөөнд орж гал нээгээд дараа нь ангид орж хүүхдүүд рүү буудаж эхэлсэн гэж эх сурвалжууд мэдээлжээ. Тэрээр гэрээсээ гарахдаа аавыгаа буудаад дараа нь ээжийнхээ ажилладаг сургууль дээр ирж ээжийнхээ болон бусад 25 хүний аминд хүрсэн нь энэ аж. Хүүхдүүдийн аминд хүрсэн гэх 20 настай Адам Ланза хоёр гар буутай, сум нэвтэрдэггүй хантааз өмссөн байсан бөгөөд өөрөө мөн амиа алдсан гэж орон нутгийн хэвлэлүүд мэдээлж байна. Гэхдээ яаж амиа алдсан нь тодорхойгүй байна. Ньютаун хотод одоогоо гашуудал зарлаад байгаа бөгөөд тус улсын ерөнхийлөгч Б.Обама гашуудал илэрхийлжээ. Тэрбээр "Бид сүүлийн хэдэн жил маш олон сэтгэл өвтгөсөн зүйлстэй нүүр туллаа. Хүүхдээ алдсан эмээ, өвөө, эцэг, эх, ах, эгч нарт гүн эмгэнэл илэрхийлье" гээд хохирогчдын ар гэрт туслахаа амалсан байна. Мөн энэ үгээ ерөнхийлөгч биш эцэг хүний үүднээс хэлсэн гээд нулимс унагаажээ.

Коннектикут мужийн Ньютаун хот нь Нью-Йорк хотоос 97 км-ын зайд байдаг аж.