Өнгөрч буй долоо хоногт дэлхий сөнөх тухай яриа, 340 мянган төгрөгөө авах гэсэн иргэдийн хүлээлтээр тасарсангүй. Энэ зуур УИХ гурван шинэ гишүүнээр бүл нэмж, эмэгтэй гишүүдийн тоог 11 болгов. Мөн Дархан-Уул аймгийн нэгэн иргэн архины үйлдвэрээ арьс ширний үйлдвэр болгож, 20 биш 180 хүнийг ажлын байраар хангах болсон таатай жишээ ярианы гол сэдэв байлаа. 24tsag.mn энэ долоо хоногийн онцлох үйл явдлуудыг нэрлэж байна.


Онцлох хүн: Энэ долоо хоногийн хамгийн, хамгийн онцлох хүнээр УИХ-ын гишүүн Д.Арвин тодорч байна. Пүрэв гарагт Д.Сарангэрэл, Г.Батхүү нарын хамт УИХ-ын гишүүний тангараг өргөсөн тэрбээр маргааш нь л МАН-аас гарч, АН- элсэх болсон тухай баттай эх сурвалжууд мэдээлж байгаа. Түүнийг МАН-ын гишүүд нь шахаж, хавчих болсон тул ийнхүү улс төрийн өөр сонголт хийж “улаан”-аас “цэнхэр” болсон гэж мэдээлж байна. Тэрбээр баасан гарагт УИХ-ын гишүүн Г.Батхүү зэрэг АН-ын томчуудын өрөөгөөр баахан эргэлдсэн сурагтай. Д.Арвин гишүүн болсноор УИХ 11 эмэгтэй гишүүнтэй болсон ч МАН-ын биш АН-ын бүлэг бүл нэмж байгаа бололтой.

Онцлох мэдэгдэл: Шинэ жил хаяанд ирж, улс төрчид ч хэрхэн “ёолкдох” талаар бодож эхэлжээ. Гишүүд баярын үеэр бие биедээ цаасан биш цахим мэндчилгээ явуулж төсөв хэмнэе гэж уриалсан УИХ-ын дарга З.Энхболд энэ удаа  олонд таалагдах бас нэг зарлиг гаргав. Тэрбээр гишүүд Шинэ жилийн баяр тэмдэглэх мөнгийг төсвөөс биш өөрсдийн халааснаасаа гаргахыг уриалсан юм. Олон гишүүн ч түүнийг дэмжсэн. Харин үүнээс илүү онцлох нь С.Бямбацогт гишүүн "УИХ дахь МАН-ын бүлгийн гишүүд Их хурлын Шинэ жилд оролцохгүй" гэж мэдэгдэв. Учир нь тэд эхний ээлжинд УИХ дахь бүлгээ албан ёсны болгох гэх зэрэг эрх баригчидтай зөрчилтэй байгаа асуудлаа шийдэх ёстой гэж үзсэн аж. "Асуудлаа шийдэхгүйгээр Шинэ жилийн баярт ороод бие бие рүүгээ муухай хараад суултай биш" гэж зарим нь ярьж байгаа аж.

Онцлох урилга: Сүүлийн үед улс төрчдийн дунд “халз мэтгэлцээн ид моданд ороод байна. УИХ-ын гишүүн С.Ганбаатар, С.Баярцогт нарын мэтгэлцээнээс хойш юм л бол нэгийгээ дуэльд дуудах гээд байдаг болж. Энэ долоо хоногийн сүүл мушгин МАХН-ын хоёр эмэгтэй гишүүн УИХ-ын гишүүн Ц.Нямдоржийг халз мэтгэлцээнд дуудав. Ц.Нямдорж гишүүн хэвлэлд өгсөн ярилцлагаараа МАХН-ын гишүүд, дэмжигчдыг доромжилсон гэж үзсэн тул Л.Эрдэнэтуул, А.Одончимэг нар түүнтэй мэтгэлцэхийг хүсчээ. Харин Ц.Нямдорж сайд тэдний урилгыг хүлээж авах эсэх нь сонин.

Онцлох маргаан:  УИХ-ын гишүүн Ж.Батзандан шадар сайд Д.Тэрбишдагвыг огцрохыг шаардсан нь бас л сонин үйл явдал байлаа. Шадар сайдын хариуцдаг Онцгой байдлын алба, Мэргэжлийн хяналтын ерөнхий газар нь  ажлаа муу хийж байгаа нь Д.Тэрбишдагва сайдтай холбоотой гэж Г.Батзандан гишүүн үзжээ. Тэрбээр “Ажлаа хийж чаддаггүй, ард түмэнд бус өөрийн намынхаа хэдэн дарга нарт үйлчилдэг, эх орон нэгтнүүддээ биш, Н.Энхбаярт үйлчилдэг ийм Шадар сайд Монголд хэрэггүй” гэсэн. Харин шадар сайд хариуд нь “Ж.Батзандан улс төрийн захиалгатай зүйл хийж, өөрийгөө баатар болгох, утсан хүүхэлдэй болгох алхам хийж байгаад харамсаж байна” гэв. Энэ маргаан ирэх долоо хоногт ч үргэлжлэх бололтой.

Онцлох шагнал: МоАХ-ны 23 жилийн ойгоор ШӨХТГ-ын дарга О.Магнай "2012 оны эзэн”-ээр тодорлоо.  МоАХ-ны тэргүүн Х.Баттулга "О.Магнайг ажлаа авч ажиллаж эхэлснээс хойш маш олон асуудал цэгцэрч голдиролдоо орсон. Одоо хүмүүс ямарваа нэгэн асуудал гарвал шүүхэд биш О.Магнайд хэлнэ шүү гэдэг болж" гэсэн юм. Үнэхээр ч О.Магнайг хэвлэлүд аль хэдийн оны онцлох хүнээр тодруулаад байгаа. О.Магнай “Би хувьсгалч хүн. Тийм учраас Монголын Ардчилсан холбооны шагнал бол миний хувьд хамгийн нэр хүндтэй шагнал маань байх болно” гэсэн юм.

Онцлох сайн мэдээ: Хойд эцэг нь 7 настай хүүгээ сэхээнд ортол нь зодсон хэрэг гарч, монголчуудыг цочоосон. Харин одоогоор хүүгийн бие сайжирч байгаа бөгөөд сэхээнээс энгийн тасагт шилжээд байгаа юм. Өнгөрч буй долоо хоногт  Нийслэлийн Цагдаагийн газар хүүд тусалж, цагдаа дуудсан иргэн Н.Болортуяаг талархлын бичиг, үнэ бүхий зүйлээр шагналаа. Түүнд энгийн иргэд ч өөрсдийн хэрээр талархлаа илэрхийлж байна. Харин хүүгээ зодсон хойд эцгийг Эрүүгийн хуулийн дагуу шийтгэхээр шалгаж байгаа аж.