МАХН-ын Гүйцэтгэх товчоо өчигдөр хуралдаж, МАХН хамтарсан Засгийн газраас гарахгүй байх шийдвэрийг гаргасан. Ингээд энэ талаар МАХН-ын Ерөнхий Нарийн бичгийн дарга Г.Шийлэгдамбатай ярилцлаа.
    МАХН-ын Гүйцэтгэх товчоо өчигдөр хуралдаж, МАХН хамтарсан Засгийн газраас гарахгүй байх шийдвэрийг гаргасан. Ингээд энэ талаар МАХН-ын Ерөнхий Нарийн бичгийн дарга Г.Шийлэгдамбатай ярилцлаа.

-МАХН хамтарсан Засгийн газраас гарахгүй байхаар шийдсэн гэнэ. Чухам яагаад ийм шийдвэр гаргах болов?

-Гүйцэтгэх товчоо өчигдөр хуралдаад, Засгийн газраас гарах эсэхээ эргэн харах шийдвэр гаргасан. Учир нь бид Засгийг тогтвортой ажиллах нь зүйтэй гэж гэж үзэж байна.

-“МАХН-МҮАН”-ын “Шударга ёс” эвслийн Удирдах зөвлөл энэ асуудлаар хуралдана гэж байсан юу болов?

-Нэгэнт гүйцэтгэх товчоо энэ асуудлаар хуралдаж, МАХН Засгийн газраас гарах  шийдвэрээ эргэн харах болсон учир эвслийн удирдах зөвлөлийг хуралдуулах шаардлагагүй гэж үзсэн.

-Мөн МАХН-ын дарга Н.Энхбаярыг 2013 оны Ерөнхийлөгчийн сонгуульд нэр дэвшүүлэх асуудлыг хурлаараа ярина гэсэн. Ярьсан юм болов уу?

-Гүйцэтгэх товчооны хурлаар зөвхөн МАХН хамтарсан Засгаас гарах эсэхийг л хэлэлцсэн. МАХН-ын дарга Н.Энхбаярыг Ерөнхийлөгчийн сонгуульд нэр дэвших асуудлыг яриагүй. Ярих ч болоогүй. Энэ бол албан ёсны асуудал биш. Хуулийн дагуу Ерөнхийлөгчийн сонгуульд нэр дэвших эсэх асуудлыг ярилцах үед нь ярина.

-Тэгэхээр ял шийтгэлтэй хүн Ерөнхийлөгчийн сонгуульд нэр дэвшинэ гэдэг хуулийн дагуу байж боломгүй юм?

-Мэдээж бид Н.Энхбаяр даргыг хэлмэгдсэн гэж үзэж байгаа. Одоо Н.Энхбаяр даргад тулгаад буй хоёр хэрэг бол өөрт нь ямарч холбоогүй хамаагүй асуудал. Хувьчлалын цаана байгаа асуудал Н.Энхбаяр даргад хамаарахгүй. Хууль эрхзүйн хувьд ч ямарч боломжгүй асуудал. Тиймээс Н.Энхбаяр даргын хэргийг цаашид цагаатгах зүйтэй гэсэн байр суурийг манай төлөөлөгчид үзэж байгаа. Энэ үүднээс 2013 оны хувьд Ерөнхийлөгчийн сонгуультай холбоотой асуудал  яригдах үеэр Н.Энхбаяр даргыг Ерөнхийлөгчийн сонгуульд  нэр дэвшүүлэх ёстой гэсэн саналыг Иргэдийн төлөөлөгчид илэрхийлж байсан. Гүйцэтгэх товчооны хурлаар иргэдийн хурлын төлөөлөгчдийн зүгээс тавьсан дээрх саналуудыг сонссон. Харин хэлэлцээгүй.

-Олон нийт танай намыг зөвхөн нэг хүний эрх ашгийг нэн түрүүнд тавьдаг хэмээн харж байна?

-МАХН Засгаас гарна хэмээн мэдэгдсэн нь зөвхөн Н.Энхбаяр даргын асуудлаас болоогүйг бид олон дахин хэлж байна. Засгаас гарах эсэх асуудал яригдах болсон нь хэд хэдэн шалтгаантай.

Нэгдүгээрт, орон нутгийн сонгуулийн үеэр МАХН-д учирсан бэрхшээл, тус намаас дэвшсэн нэр дэвшигчдийг орон нутгийн сонгуульд оролцуулахгүй байх, оролцсон тохиолдолд хуулинд байхгүй саад бэрхшээлийг туулсан нөхцөл байдлыг улс төрийн хэлмэгдүүлэлтийн нэг хэлбэр гэж үзэж байсан.

Мөн МАХН-ын дарга Н.Энхбаяртай холбоотой бас асуудлыг улс төрийн хэлмэгдүүлэлт явуулж байна гэж үзээд ёс зүйн хувьд манай нам Шинэчлэлийн гэж байгаа  Засгийн газар хууль ёсыг эрхэмлэн сахих үүргийг хангалттай биелүүлэх учиртай гэсэн үүднээс уг асуудлыг хөндөж тавьж байсан.

Улс төрийн хэлмэгдүүлэлт, сонгуулийн булхай будилаантай явдлыг хяналт тавьж зогсоохын тулд гадна  биш дотор  нь  ажиллаж бүх шатанд хяналтыг тавьж байж, энэ шударга бус байдлыг зогсоож чадна гэж үзсэн. Тиймээс л энэхүү шийдвэрийг гаргаад байсан юм.

-Мөн танай нам саяхан ИТХ-ын төлөөлөгчидтэй ёс зүйн гэрээ байгуулсан?

-МАХН-аас нэр дэвшиж ИТХ-ын төлөөлөгч болсон манай гишүүд шударга ёсыг орон нутагтаа хэрэгжүүлэх ёстой. Нөгөө талаас, намын болоод намын гишүүдийн хариуцлага гэж бий. Намын гишүүд хариуцлагатай ажиллах ёстой, нам өөрөө гишүүдийнхээ өмнө хариуцлага хүлээх ёстой. Энэ үүднээс орон нутагт мандат авсан 218 ИТХ-ын төлөөлөгчтэй нам, намын ёс зүйн хороо, Ерөнхий нарийн бичгийн дарга хамтран ёс зүй, хариуцлагын гэрээ байгуулсан. МАХН-ын гол жанжин шугам юу вэ гэвэл бид шударга ёсыг тогтоох ёстой, түүний тулд өөрсдөө хариуцлагатай байх ёстой гэж үзэл, баримтлалаа тодорхойлсон. Тиймээс гэрээ ч бас хариуцлагатай, ёс зүйтэй ажиллахыг үндэс болгосон.