Дуучин, жүжигчин Селена Гомесийн хамтран үүсгэн байгуулсан сэтгэцийн эрүүл мэндийн чиглэлийн "Wondermind" стартаптай холбоотойгоор хөрөнгө оруулагчид түүнийг болон компанийн бусад үүсгэн байгуулагчдыг залилангийн хэрэгт буруутган шүүхэд өгчээ. Хэрэг Делавэр мужийн холбооны шүүхэд гаргасан нэхэмжлэлтэй холбоотой байна. 

Хөрөнгө оруулагчид нийтдээ ойролцоогоор 1.2 сая ам.доллар "Wondermind"-д оруулсан бөгөөд үүнийг хийхдээ Гомесийн компанийн үйл ажиллагаанд идэвхтэй оролцож, өөрийн асар олон дагагчийг ашиглан брэндийг хөгжүүлнэ гэсэн мэдээлэлд итгэсэн гэжээ. Гомес 2021 онд ээж Мэнди Тифей болон бизнес эрхлэгч Даниэлла Пирсонтой хамт "Wondermind"-ийг байгуулсан. Тэрбээр компанийнхаа маркетингийг хариуцдаг гэнэ. Хөрөнгө оруулагчдын үзэж буйгаар тэр энэ үүргээ гэрээгээр хүлээсэн ч бүрэн хэрэгжүүлээгүй аж. Тухайлбал, компанийн хөгжүүлэхээр амласан гар утасны аппликэйшн хэзээ ч бүтээгүй гэж нэхэмжлэлд дурдсан байна.

Мөн хөрөнгө оруулагчид "Wondermind" санхүүгийн болон үйл ажиллагааны хувьд ноцтой хүндрэлд орсон тухай мэдээллээ тэднээс нуусан гэж буруутгажээ. Компанийн ажилтнууд болон үйлчилгээ үзүүлэгчдэд төлбөрөө хугацаанд нь төлж чадахгүй болсон, бизнесийн дотоод зохион байгуулалт муудсан гэх мэдээлэл өмнө нь гарч байсан.

Нэхэмжлэлд мөн компанийн зарим түншлэл, бизнесийн санаачилга бодитоор хэрэгжээгүй байхад хөрөнгө оруулагчдад амжилттай хэрэгжих мэтээр танилцуулсан гэжээ. Хөрөнгө оруулагчид компанийн бодит нөхцөл байдлыг зөвхөн 2025 оны есдүгээр сард нийтлэгдсэн хэвлэлийн нийтлэлээр дамжуулан мэдсэн гэж мэдүүлсэн байна.

Хэрэгт Селена Гомесоос гадна түүний ээж, "Wondermind"-ийн гүйцэтгэх захирал асан Мэнди Тифей болон өмнөх бизнесийн хамтрагч Даниэлла Пирсон нар хариуцагчаар нэрлэгдсэн байна. Хөрөнгө оруулагчид оруулсан мөнгөө буцаан авахын зэрэгцээ учирсан хохирол болон хууль зүйн зардлаа нөхөн төлүүлэхийг шаардаж байгаа аж. Харин Селена Гомесийн тал уг нэхэмжлэлийн талаар одоогоор албан ёсны тайлбар хийгээгүй байна.

Л.Баяр