Аюулгүй байдал, гадаад бодлогын байнгын хорооны өнөөдрийн /2013.01.08/ хуралдаанаар Төрийн нууцын жагсаалт батлах тухай хуульд өөрчлөлт оруулах тухай хуулийн төслийн хэлэлцэх эсэх асуудлыг хэлэлцэв. Хуулийн төслийн танилцуулгыг ЗГХЭГ-ын дарга Ч.Сайханбилэг хийв.Төрийн нууцын жагсаалт батлах тухай хуулиар төрийн нууцын жагсаалтыг нарийвчлан баталдаг бөгөөд хүчин төгөлдөр үйлчилж буй Төрийн нууцын жагсаалт батлах тухай хуульд нийт 59 мэдээ, баримт бичиг, эд зүйл, обьект, ажиллагааг төрийн нууцад хамаарахаар хуульчилсан. Үүнээс цаг үеийн шаардлагыг харгалзан зарим нэг баримт бичиг, мэдээг төрийн нууцын жагсаалтаас гаргах шаардлагатай байна гэж тэрбээр танилцуулгадаа дурдсан.
Тухайлбал, уг хуулийн 1 дүгээр зүйлийн17-д “Иргэний бүртгэл, мэдээллийн улсын сан”-г Монгол Улсын үндэсний аюулгүй байдлын хүрээнд маш нууц зэрэглэлээр байнга нууцлах хугацаатайгаар төрийн нууцад хамааруулсан байна.
Гэтэл дээрх санд иргэний төрснөөс хойшхи мэдээллүүдээс биеийн давхцахгүй өгөгдлийн /гарын хурууны хээ/, Монгол Улсын харьяатаас гарсан, харьяат болсон, харьяалал сэргээсэнтэй холбогдохоос бусад мэдээллийг төрийн нууцад зайлшгүй хамааруулах шаардлагагүй гэж төсөл санаачлагчид үзжээ.
Учир нь иргэний төрсний, гэрлэсний, гэрлэлт цуцлуулсны, гэрлэлт сэргээсний, эцэг тогтоосны, үрчилсний, овог, эцэг /эх/-ийн нэр, нэр өөрчилсний, иргэний үнэмлэхийн, гадаадад зорчих эрхийн, иргэний байнгын оршин суугаа газрын бүртгэлтэй холбогдох мэдээлэл нь төрийн нууц биш гэж үзэж байгаа юм байна. Харин эдгээр мэдээллийн эх баримт бичиг нь суурь мэдээлэл, нотлох баримтын хувьд төрийн өмчид байж, үрэгдэх, устгагдахаас бүрэн хамгаалагдсан нөхцөлд, улсын онцгой объектын зэрэглэлтэй байранд хадгалагддаг байх шаардлагатай юм гэжээ.
Түүнчлэн Төрийн нууцын жагсаалт батлах тухай хуулийн 1 дүгээр зүйлийн 32-т “1:100000-аас илүү нарийвчлалтай масштабын байр зүйн зураг”-ийг байнга нууцлах хугацаатайгаар төрийн нууцын жагсаалтад хамаарахаар хуульчилсан нь Төрийн нууцын тухай хуулийн 5 дугаар зүйлийн 2 дахь хэсгийн 5-д “улсыг батлан хамгаалахад онцгой ач холбогдол бүхий обьектын байрлал, зориулалт, бэлэн байдлын зэрэглэл, хамгаалалт, тэдгээр обьектын зураг төсөл, дагалдах баримт бичиг, зардлын төсөв, обьект барьж байгуулахаар олгосон газар нутаг, холбогдох бусад мэдээлэл”-ийг батлан хамгаалах зориулалтаар төрийн нууцад хамааруулахаар хуульчилсантай зөрчилдөж байна гэж хуулийн төслийн танилцуулгад дурджээ.
Өөрөөр хэлбэл, Төрийн нууцын тухай хуулийн дээрх заалтад хамааралгүй хот төлөвлөлт, зам, гүүр, орон сууц, ойн сан, усны нөөц болон уул уурхайн орд газруудын төлөвлөлт, ашиглалтад шаардлагатай 1:500-гаас 1:100000–ны нарийвчлалтай масштабын байр зүйн зургуудыг төрийн нууцын зэрэглэлд хамааруулсан нь тодорхой зорилтот хөтөлбөрүүдийг хэрэгжүүлэх, шинээр баригдах төмөр зам болон уул уурхайн орд газруудын дагуу хот төлөвлөх, суурьшлын бүс бий болгох, авто зам, аж үйлдвэрийн цогцолбор барих, үндэсний орон зайн мэдээллийн дэд бүтэц бий болгох бүтээн байгуулалтын ажилд 1:500-гаас 1:100000 болон үүнээс илүү нарийвчлалтай байр зүйн зургуудыг ашиглах зайлшгүй нөхцөл шаардлага бий болж байгаа цаг үеийн шаардлагад нийцэхгүй байна гэж танилцуулгад дурдсан. Зарим мэдээллийг төрийн нууцын жагсаалтаас гаргах асуудлаар гишүүд нэлээд хэлэлцсэн бөгөөд Р.Гончигдорж гишүүн маргаантай байгаа асуудлыг Тусгай хяналтын дэд хороогоор хэлэлцэх нь зүйтэй гэсэн байр сууриа илэрхийлж байлаа. Ингээд санал хураалт явуулахад хуралдаанд оролцсон гишүүдийн олонх хэлэлцэхийг дэмжлээ.
